കൊടുവായൂര്‍: റോഡിന്റെ വശങ്ങളിലെ പാഴ്‌ചെടികള്‍ നീക്കാത്തത് അപകടങ്ങള്‍ക്ക് വഴിവെക്കുന്നു. കൊടുവായൂര്‍- പാലക്കാട്, പുതുനഗരം - വണ്ടിത്താവളം, പുതുനഗരം - കൊല്ലങ്കോട് എന്നീ റോഡുകളിലെ വശങ്ങളില്‍ പാഴ്‌ച്ചെടികള്‍ പത്തടിയിലധികം ഉയരത്തില്‍ വളര്‍ന്നുനിര്‍ക്കുന്നതിനാല്‍ വളവുകളില്‍ അപകടങ്ങള്‍ ദിനംതോറും വര്‍ധിക്കുകയാണ്.
പാഴ്‌ച്ചെടികള്‍ നശിപ്പിക്കുവാനായി താലൂക്ക് വികസന സമിതി യോഗത്തില്‍ പരാതി നല്‍കിയെങ്കിലും നടപടിയുണ്ടായിട്ടില്ലെന്ന് പൊതുപ്രവര്‍ത്തകര്‍ ആരോപിക്കുന്നു. പൊതുമരാമത്ത് വകുപ്പിന്റെ അനാസ്ഥയാണ് പാഴ്‌ചെടികള്‍ നീക്കാതിരിക്കുവാന്‍ കാരണമെന്നും അടിയന്തിരമായി പാഴ്‌ചെടികള്‍നീക്കം ചെയ്ത് ആവശ്യമായ ട്രാഫിക് മുന്നറിയിപ്പു ബോര്‍ഡുകള്‍ സ്ഥാപിച്ച് അപകടങ്ങള്‍ ഒഴിവാക്കണമെന്നാണ് നാട്ടുകാരുടെ ആവശ്യം.