വടകര:  മഴവെള്ള സംഭരണത്തിനും മാലിന്യ സംസ്‌കരണത്തിനും വടകര റോട്ടറി ബോധവല്‍ക്കരണം   ആരംഭിക്കുന്നു. മഴവെള്ള സംഭരണം പ്രോത്സാഹിപ്പിക്കുന്ന പരിപാടികള്‍ നടത്തുന്നതിന്റെ ഭാഗമായി  വടകര നഗരസഭ അധ്യക്ഷന്‍ കെ. ശ്രീധരനുമായി റോട്ടറി പ്രതിനിധികള്‍ ചര്‍ച്ച നടത്തി.
റോട്ടറി  അംഗം കൂടിയായ എം.ടി.പ്രദീപ് കുമാറിന്റെ ചോറോട് കൈനാട്ടിയിലെ വീട്ടില്‍  സ്ഥാപിച്ച മഴവെള്ള സംഭരണി  ചെയര്‍മാന്‍ ശ്രീധരന്‍ സന്ദര്‍ശിച്ചു. ശാസ്ത്രീയമായ  രീതിയിലാണ് പ്രദീപ് കുമാറിന്റെ വീട്ടില്‍ മഴവെള്ള സംഭരണി  ഒരുക്കിയിരിക്കുന്നത്. വീടിനു മീതെ പതിക്കുന്ന മഴവെള്ളം പൈപ്പ് വഴി  വീട്ടുവളപ്പില്‍ സജ്ജീകരിച്ച കുളത്തില്‍ സൂക്ഷിക്കുകയാണ് ചെയ്യുന്നത്.
മാലിന്യ സംസ്‌കരണത്തിന്  ആരംഭിച്ച ദീപ്തി എക്കോ സ്‌റ്റോറിന്റെ ബാരല്‍ കമ്പോസ്റ്റ് സംവിധാനവും  ചെയര്‍മാന്‍ സന്ദര്‍ശിച്ചു. വീടുകളില്‍ നിന്നും മറ്റും പുറന്തള്ളുന്ന ഖരമാലിന്യം  സംസ്‌കരിക്കാവുന്ന വിധത്തിലാണ് ബാരല്‍ കമ്പോസ്റ്റ് ഒരുക്കിയിട്ടുള്ളത്.  സമൂഹത്തിനു ഭീഷണിയായി മാറിയ മാലിന്യം സംസ്‌കരിക്കാന്‍ ഇത്  ഫലപ്രദമാണെന്ന് ഇവര്‍ വെളിപ്പെടുത്തി.
നഗരസഭയുമായി സഹകരിച്ച്  റോട്ടറി ക്ലബ്  ബോധവല്‍ക്കരണ ക്ലാസുകള്‍ സംഘടിപ്പിക്കുമെന്ന് റോട്ടറി പ്രസിഡന്റ്  പി.സി.ബല്‍റാം അറിയിച്ചു. സെക്രട്ടറി സുധീര്‍ കുമാര്‍, മുന്‍ പ്രസിഡന്റുമാരായ സത്യന്‍, രവീഷ്  ജിഷു , അനൂപ് കുമാര്‍ എന്നിവര്‍ ചര്‍ച്ചയില്‍ പങ്കെടുത്തു.