ബാലുശ്ശേരി: മോട്ടോര്‍ ബൈക്കില്‍ 25 കുപ്പി വിദേശ മദ്യം കടത്തുകയായിരുന്ന കണ്ണാടിപ്പൊയില്‍ തോട്ടത്തില്‍ പൊയില്‍ വേലായുധന്‍ എന്ന ജോസഫിനെ (59)നെയാണ് ബാലുശ്ശേരി എക്‌സൈസ് സംഘം പിടികൂടിയത്.
ബാലുശ്ശേരി സര്‍ക്കാര്‍ കോളജിനടുത്ത റോഡില്‍ വാഹന പരിശോധനക്കിടയിലാണ് വേലായുധന്‍ പിടിയിലായത്. മദ്യം കടത്താനുപയോഗിച്ച ബൈക്ക് എക്‌സൈസ് ഉദ്യോഗസ്ഥര്‍ പിടിച്ചെടുത്തു. ബാലുശ്ശേരി ടൗണ്‍ കേന്ദ്രീകരിച്ച് വിദേശ മദ്യ വില്‍പ്പന തകൃതിയായി നടക്കുന്നതായി ആക്ഷേപമുണ്ടായിരുന്നു. ഹൈസ്‌കൂള്‍ റോഡ്, കൈരളി ജങ്ഷന്‍ എന്നിവിടങ്ങള്‍ കേന്ദ്രീകരിച്ചാണ് മദ്യ വില്‍പ്പന.
റെയ്ഡിന് എക്‌സൈസ് ഇന്‍സ്‌പെക്ടര്‍ ആര്‍.എന്‍ ബൈജു, പ്രിവന്റീവ് ഓഫിസര്‍ യു.പി മനോജ്, സി.ഇ.ഒമാരായ സി.പി ഷാജു, പ്രഭിത്‌ലാല്‍, കെ.കെ ശിവകുമാര്‍, ടി.കെ കൃഷ്ണന്‍ പങ്കെടുത്തു.