റിയാദ്: സഊദിയില്‍ ജോലി ചെയ്യുന്ന വിദേശികളുടെയും സ്വദേശികളുടേയും പൂര്‍ണ കണക്കുകള്‍ അധികൃതര്‍ പുറത്തുവിട്ടു. സ്വദേശികളെയും പിന്തള്ളി ഇന്ത്യക്കാരാണ് ഏറ്റവും മുന്നില്‍ നില്‍ക്കുന്നത്. ഇവിടെ താമസിച്ചു ജോലി ചെയ്യുന്ന വിവിധ രാജ്യങ്ങള്‍ക്കിടയില്‍ ആകെ തൊഴിലാളികളില്‍ 19.8 ശതമാനമാണ് ഇന്ത്യക്കാര്‍. സഊദി പൗരന്മാരുള്‍പ്പെടെയുള്ള വിവിധ രാജ്യങ്ങളിലുള്ളവരാണ് ബാക്കിയുള്ളവര്‍. സഊദി തൊഴില്‍, സാമൂഹിക വികസന മന്ത്രാലയം ഔദ്യോഗികമായി പ്രസിദ്ധീകരിച്ച പട്ടികയിലാണ് ഇന്ത്യക്കാര്‍ മുന്‍പന്തിയില്‍ നില്‍ക്കുന്നത്.

വിദേശികളില്‍ ഒന്നാം സ്ഥാനം ഇന്ത്യക്കാര്‍ പങ്കിടുമ്പോള്‍ 17.4 ശതമാനം തൊഴിലാളികളുള്ള പാക്കിസ്ഥാന്‍ രണ്ടാം സ്ഥാനത്താണ്. ഇന്ത്യക്കും പാകിസ്ഥാനും പിറകെയാണ് മൂന്നാം സ്ഥാനത്തായി സഊദി പൗരന്മാരുള്ളതെന്നത് ശ്രദ്ധേയമാണ്. തൊഴില്‍ മേഖലയില്‍ സഊദി പൗരന്മാരുടെ തോത് 16.7 ശതമാനമാണ്. തൊഴിലാളികളുടെ എണ്ണത്തില്‍ ഈജിപ്ത് (9.9%), ബംഗ്ലാദേശ് (9.5%) എന്നീ രാജ്യക്കാര്‍ നാലും അഞ്ചും സ്ഥാനം അലങ്കരിക്കുന്നു. യെമന്‍ (6.7 %), ഫിലിപ്പീന്‍സ് (5.0%), സുഡാന്‍ (3.8%), നേപ്പാള്‍ (3.6%), സിറിയ (1.6%) എന്നീ രാജ്യങ്ങളിലെ പൗരന്മാരാണ് ആറ് മുതല്‍ പത്ത് വരെയുള്ള സ്ഥാനക്കാര്‍.