നടവയല്‍: കഞ്ചാവ്, മയക്ക് ഗുളികള്‍ അടക്കമുള്ള മയക്ക് മരുന്ന് ലോബികളുടെ ഇടത്താവളമായി നടവയല്‍ മേഖല മാറുന്നതായി സൂചന.
പൊലിസിന്റേയും എക്‌സൈസിന്റേയും കണ്ണ് വെട്ടിച്ചാണ് വ്യാപാരം. നെയ്ക്കുപ്പ പാലം, ചിറ്റാലൂര്‍ക്കുന്ന്, കായക്കുന്ന് ചെക്കിട്ട, അപ്രോച്ച് റോഡ്, പൂതാടി കോട്ടവയല്‍ തുടങ്ങിയ കേന്ദ്രങ്ങളിലാണ് കഞ്ചാവ് സംഘങ്ങള്‍ പ്രവര്‍ത്തിക്കുന്നത്. ബൈരക്കുപ്പ, ബാവലി തുടങ്ങിയ സ്ഥലങ്ങളില്‍ നിന്നാണ് ഏജന്റുമാര്‍ കഞ്ചാവ് എത്തിക്കുന്നത്. ആഴ്ചകള്‍ക്ക് മുന്‍മ്പ് പൂതാടിയില്‍ നടന്ന കൊലപാതകത്തിന് ശേഷം കോട്ടവയല്‍ പ്രദേശത്ത് പൊലിസ് പരിശോധന കാര്യക്ഷമമാക്കിയതോടെ കഞ്ചാവ് സംഘം സ്ഥലം മാറിയാണ് പ്രവര്‍ത്തിക്കുന്നത്. നടവയല്‍ മേഖലയില്‍ വര്‍ധിച്ചു വരുന്ന മയക്ക് മരുന്ന് ലോബികള്‍ക്കെതിരേ നാട്ടുകാരും രംഗത്തുണ്ട്. സംശയകരമായി കാണുന്ന യുവാക്കളെ പൊലിസില്‍ ഏല്‍പ്പിക്കാനും നാട്ടുകാര്‍ തീരുമാനിച്ചു.
രണ്ട് പൊലിസ് സ്റ്റേഷനുകളുടെ അതിര്‍ത്തിയായ നടവയലിലെ കഞ്ചാവ് വില്‍പ്പനയും ഉപയോഗവും തടയാന്‍ പൊലിസ് ശക്തമായ നടപടികള്‍ സ്വീകരിക്കണമെന്നാണ് നാട്ടുകാരുടെ ആവശ്യം.