കമ്പളക്കാട്: ഗവ. യു.പി സ്‌കൂളില്‍ പ്രാദേശിക പി.ടി.എ പദ്ധതി ആരംഭിച്ചു. വിവിധ മേഖലകളില്‍ ജോലി ചെയ്യുന്ന രക്ഷിതാക്കളായതിനാല്‍ അവര്‍ക്ക് സ്‌കൂള്‍ പി.ടി.എ യോഗങ്ങളില്‍ കൃത്യമായി പങ്കെടുക്കാനോ തങ്ങളുടെ മക്കളുടെ പഠന നിലവാരം അറിയുന്നതിനോ സാധിക്കാറില്ല.
കൂടാതെ തങ്ങളുടെ മക്കളുടെ അധ്യാപകര്‍ ആരെന്ന് രക്ഷിതാക്കള്‍ക്കോ വിദ്യാര്‍ഥികളുടെ രക്ഷിതാക്കളാരെന്ന് അധ്യാപകര്‍ക്കോ അറിയാത്ത സാഹചര്യത്തിലാണ് ഇത്തരമൊരു പദ്ധതി ആരംഭിച്ചത്. ഓരോ ആഴ്ചയിലേയും ശനിയും ഞായറും വൈകിട്ട് ആറിനാണ് പ്രാദേശിക പി.ടി.എ ഓരോ കേന്ദ്രങ്ങളിലായി ചേരുക. അധ്യാപകരും രക്ഷിതാക്കളും തങ്ങളുടെ കുട്ടികളുടെ കാര്യങ്ങള്‍ ചര്‍ച്ച ചെയ്യുകയും പരിഹാരം കണ്ടെത്തുകയും ചെയ്യുകയെന്നതാണ് ഇതിന്റെ ലക്ഷ്യം. സാധാരണക്കാരായ രക്ഷിതാക്കളുടെ വലിയ പിന്തുണയാണ് അധ്യാപകര്‍ക്ക് ഇതിലൂടെ ലഭിക്കുന്നത്.
കഴിഞ്ഞ ദിവസം നടന്ന പ്രാദേശിക പി.ടി.എ യോഗം ഗ്രാമ പഞ്ചായത്ത് പ്രസിഡന്റ് കടവന്‍ ഹംസ ഉദ്ഘാടനം ചെയ്തു. വാര്‍ഡംഗം റയ്ഹാനത്ത് ബഷീര്‍ അധ്യക്ഷയായി. എം.വി സുരേഷ് കുമാര്‍, സി.ടി സലീം, സീതാ ബാലന്‍, അഷ്‌റഫ് പഞ്ചാര, പി.ജെ അല്‍ഫോന്‍സ്, ലിനേഷ് കുമാര്‍, കെ.വി ഡെയ്‌സി, വി.ആര്‍ സത്യഭാമ സംസാരിച്ചു.