ദ്വാരക: തെറ്റുകളും കുറവുകളും പരിഹരിച്ച് കൊണ്ടുള്ള പുതിയ റേഷന്‍ കാര്‍ഡുകള്‍ നാലു മാസത്തിനകം വിതരണം ചെയ്യുമെന്ന് ഭക്ഷ്യ പൊതുവിതരണ വകുപ്പ് മന്ത്രി പി തിലോത്തമന്‍ പറഞ്ഞു. എടവകയില്‍ സപ്ലൈക്കോ മാവേലി സ്റ്റോര്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
റേഷന്‍ കാര്‍ഡ് വിതരണം ഇപ്പോള്‍ തന്നെ വളരെയധികം വൈകിയിരിക്കുകയാണ്. പുതിയ ഡാറ്റകള്‍ ഉള്‍പ്പെടുത്തിയപ്പോള്‍ നിരവധി തെറ്റുകള്‍ കടന്ന് കൂടിയിട്ടുണ്ട്. ഇതെല്ലാം പരിശോധിച്ച് തെറ്റുകളും കുറവുകളുമെല്ലാം പരിഹരിച്ചായിരിക്കും പുതിയ റേഷന്‍ കാര്‍ഡ് വിതരണം ചെയ്യുക.
അടുത്ത ഘട്ടമെന്ന നിലയില്‍ ഇ-റേഷനിങ് സമ്പ്രദായം ഏര്‍പ്പെടുത്തുമെന്നും മന്ത്രി പറഞ്ഞു. റേഷന്‍ കടകളിലെത്തുന്ന ഉപഭോക്താവിന്റെ മുഴുവന്‍ വിവരങ്ങളും സമ്പ്രദായത്തിലൂടെ ലഭ്യമാക്കും. ഇതിനാല്‍ തന്നെ ഉപഭോക്താവിന് ലഭിക്കേണ്ട മുഴുവന്‍ ആനുകൂല്യങ്ങളും ലഭിക്കും.
വില കയറ്റത്തിന് കാരണക്കാരാകുന്ന ഇടനിലക്കാരെയും കൊള്ളലാഭം കൊയ്യുന്നവര്‍ക്കെതിരേയും കര്‍ശന നടപടികള്‍ സ്വീകരിക്കും. അടുത്ത അഞ്ച് വര്‍ഷത്തേക്ക് സപ്ലൈക്കോ വഴി വിതരണം ചെയ്യുന്ന സാധനങ്ങളുടെ വില വര്‍ധിപ്പിക്കില്ലെന്നും മന്ത്രി കൂട്ടി ചേര്‍ത്തു. എടവക ഗ്രാമ പഞ്ചായത്ത് പ്രസിഡന്റ് ഉഷാ വിജയന്‍ അധ്യക്ഷയായി. ജില്ലാ പഞ്ചായത്ത് പ്രസിഡന്റ് ടി ഉഷാകുമാരി ആദ്യവില്‍പ്പന നിര്‍വഹിച്ചു.
ബ്ലോക്ക് പഞ്ചായത്ത് പ്രസിഡന്റ് പ്രീതാരാമന്‍, സപ്ലൈക്കോ ജനറല്‍ മാനേജര്‍ കെ വേണുഗോപാല്‍, നജ്മുദ്ദിന്‍ മൂടമ്പത്ത്, ആമിന അവറാന്‍, ജില്‍സന്‍ തൂപ്പുംകര, ആഷമേ ജോണ്‍, ഫാത്തിമ ബിഗം, എം.പി വത്സന്‍, ബിന്ദു ജോണ്‍, കെ.ആര്‍ ജയപ്രകാശ് സംസാരിച്ചു.

ഈമാസം