ആറ്റിങ്ങല്‍: നഗരത്തിലെ വിവിധ കടകളില്‍ തട്ടിപ്പു നടത്തിയ പ്രതിയെ തെളിവെടുപ്പിനായി കൊണ്ടുവന്നു. മുനിസിപ്പല്‍ ബസ് സ്റ്റാന്റിനുള്ളിലെ മൊബൈല്‍ കടയിലേയും നഗരത്തിലെ ഡ്രൈക്ലീനിങ് സ്ഥാപനത്തിലേയും ജീവനക്കാരെ കബളിപ്പിച്ച് പണം കവര്‍ന്ന കേസിലെ പ്രതിയെ ആറ്റിങ്ങല്‍ പൊലിസ് തെളിവെടുപ്പിനായി കഴിഞ്ഞ ദിവസം ആറ്റിങ്ങലില്‍ കൊണ്ടുവന്നു. പത്തനംതിട്ട റാന്നി മല്ലപ്പള്ളി കീഴ്വായൂര്‍ സ്വദേശി രാജേഷ് ജോര്‍ജ്ജിനെയാണ് (41)തട്ടിപ്പു നടത്തിയ കടകളില്‍ എത്തിച്ച് തെളിവെടുപ്പ് നടത്തിയത്.
കഴിഞ്ഞ മാസം 26ന് ആറ്റിങ്ങല്‍ മുനിസിപ്പല്‍ ബസ് സ്റ്റാന്റിനുള്ളിലെ ഷാജിയുടെ ഉടമസ്ഥതയിലുള്ള മൊബൈല്‍ കടയിലും ആറ്റിങ്ങല്‍ ടൗണിലെ ഡ്രൈക്ലീനിങ് കടയിലുമാണ്  വിശ്വസനീയമായ രീതിയില്‍ പെരുമാറി പണം തട്ടിയെടുത്ത് ഇയാള്‍ മുങ്ങിയത്. ഇത് ശ്രദ്ധയില്‍പെട്ട റാന്നി സ്റ്റേഷനിലെ പൊലിസുകാരനാണ് ആളെ തിരിച്ചറിഞ്ഞ് വിവരം ആറ്റിങ്ങല്‍ പൊലിസിന് കൈമാറിയത്. കൊല്ലം ജില്ലയിലെ പുനലൂരിലും പത്തനംതിട്ടയിലെ വിവിധ സ്ഥലങ്ങളിലും സമാനമായ രീതിയില്‍ തട്ടിപ്പ് നടത്തിയതിന് മുന്‍പ് പിടിയിലായ രാജേഷ് ജോര്‍ജ്ജാണ് ആറ്റിങ്ങലില്‍ നിന്ന് പണം തട്ടിയെടുത്ത് മുങ്ങിയതെന്ന് അന്വേഷണത്തില്‍ മനസിലായി. അതോടെയാണ് ഇയാള്‍ പിടിയിലായത്.
തട്ടിപ്പു നടത്താന്‍ കട തിരഞ്ഞെടുത്തു കഴിഞ്ഞാല്‍  കട ഉടമയുടെ വിവരങ്ങള്‍ ആദ്യം തിരക്കി അറിയും. അതിനു ശേഷം ഉടമ ഇല്ലാത്ത സമയം കടയിലെത്തി ഉടമയുടെ അടുത്ത സുഹൃത്തെന്ന രീതിയില്‍  ഫോണില്‍ സംസാരിച്ച് ജീവനക്കാരുടെ വിശ്വാസ്യത നേടും. ഉടമ പറഞ്ഞിട്ടെന്നു ധരിപ്പിച്ച് പണം ജീവനക്കാരില്‍ നിന്നും തട്ടിയെടുക്കുകയാണ് ഇയാളുടെ രീതി. എല്ലാ തട്ടിപ്പും ഒരേ രീതിയിലാണ് നടത്തി വന്നിരുന്നതെന്ന് പൊലിസ് പറഞ്ഞു.