തിരുവനന്തപുരം: ദേശീയ ആരോഗ്യ ദൗത്യത്തിന്റെ നേതൃത്വത്തില്‍ ലോകമുലയൂട്ടല്‍ വാരാചരണത്തിന്റെ ജില്ലാതല ഉദ്ഘാടനം പരുത്തിപ്പള്ളി സി.എസ്.ഐ ഹാളില്‍ കുറ്റിച്ചല്‍ ഗ്രാമപ്പഞ്ചായത്ത് പ്രസിഡന്റ് ജി. മണികണ്ഠന്‍ നിര്‍വഹിച്ചു. പ്രകൃതി കനിഞ്ഞു നല്‍കിയ സമ്പൂര്‍ണ ആഹാരമാണ് മുലപ്പാല്‍. രണ്ട് വയസുവരെ കുട്ടികളുടെ പ്രധാന ആഹാരവും പാലാണ്. മറ്റേത് ആഹാരത്തേക്കാളും കുഞ്ഞിന് പ്രിയവും സംതൃപ്തിയും നല്‍കുന്ന അമൃതാണ് അമ്മയുടെ മുലപ്പാലെന്ന് അദ്ദേഹം പറഞ്ഞു. ജില്ലാ മെഡിക്കല്‍ ഓഫിസര്‍ ഡോ.ജോസ് ഡിക്രൂസ് അധ്യക്ഷനായി. ആരോഗ്യകേരളം തിരുവനന്തപുരം ജില്ലാ പ്രോഗ്രാം മാനേജര്‍ ഡോ.ജെ.സ്വപ്‌നകുമാരി മുഖ്യപ്രഭാഷണം നടത്തി.
പരിപാടിയില്‍ കുറ്റിച്ചല്‍ ഗ്രാമപ്പഞ്ചായത്ത് ക്ഷേമകാര്യ സ്റ്റാന്റിംഗ് കമ്മിറ്റി ചെയര്‍പേഴ്‌സണ്‍ നബീസത്ത് എന്നിവര്‍ സംസാരിച്ചു.