കോതമംഗലം: ശബരിമലയില്‍ യുവതികള്‍ കയറിയെന്ന അവകാശവാദവുമായി വൈദ്യുതി മന്ത്രി എം.എം മണി. കോതമംഗലത്ത് മാധ്യമങ്ങളോട് സംസാരിക്കുകയായിരുന്നു അദ്ദേഹം.
വനിതകളും യുവതികളുമെല്ലാം ശബരിമലയില്‍ വരുന്നുണ്ടെന്നും കാണിക്ക ഇടുന്നുണ്ടെന്നും മന്ത്രി പറഞ്ഞു. ഇത് യുവതീ പ്രവേശനത്തിലെ സര്‍ക്കാരിന്റെ ഔദ്യോഗിക പ്രഖ്യാപനമാണോയെന്ന ചോദ്യത്തോട് അതേ എന്നാണ് മന്ത്രി പ്രതികരിച്ചത്.
വനിതകളൊക്കെ ഇഷ്ടം പോലെ വരുന്നുണ്ട്. യുവതികളും കയറിയിട്ടുണ്ട്. കയറിയില്ലെന്നാണോ വിശ്വസിക്കുന്നത്.
ഞങ്ങള്‍ക്ക് വേണമെങ്കില്‍ ഒരു ലക്ഷം യുവതികളുമായി അങ്ങ് പൊയ്ക്കൂടെ. സ്ത്രീകള്‍ ആരാധന നടത്തിയിട്ടില്ലെന്ന് സര്‍ക്കാര്‍ എവിടെയെങ്കിലും പറഞ്ഞിട്ടുണ്ടോ? എല്ലാം കൃത്യമായി തന്നെ നടന്നിട്ടുണ്ടെന്നും മന്ത്രി പറഞ്ഞു.