കൊല്ലം: ചാമക്കട ഇ.എം.എസ് റെഡ്യാറിന്റെ ഉടമസ്ഥതയിലുള്ള ഗോഡൗണില്‍ തീപിടിത്തം. ഇന്നലെ രാവിലെ പതിനൊന്നോടെയാണ് അടച്ചിട്ടിരുന്ന ഗോഡൗണിന് തീപിടിച്ചത്. ഫയര്‍ഫോഴ്‌സ് എത്തി തീയണച്ചു.
രക്ഷാപ്രവര്‍ത്തനത്തിനിടെ ദേഹാസ്വാസ്ഥ്യമുണ്ടായ ഫയര്‍മാന്‍ രഞ്ജിത്ത് കുമാറിനെ ജില്ലാ ആശുപത്രിയിലേക്ക് മാറ്റി. ഗോഡൗണിന്റെ മുകളിലത്തെ നിലയില്‍നിന്ന് പുക ഉയരുന്നതുകണ്ട് അടുത്തുണ്ടായിരുന്ന തൊഴിലാളികള്‍ ഫയര്‍ഫോഴ്‌സിനെ വിവരം അറിയിക്കുകയായിരുന്നു. ജില്ലാ ഫയര്‍ ഓഫിസര്‍ ഹരികുമാറിന്റെ നേതൃത്വത്തിലുള്ള സംഘമാണ് തീയണച്ചത്.
സ്റ്റേഷന്‍ ഓഫിസര്‍മാരായ സുരേഷ് കുമാര്‍, പി.എസ് സാബുലാല്‍ എന്നിവരും ട്രാക്ക് വളണ്ടിയര്‍മാരും നാട്ടുകാരും രക്ഷാപ്രവര്‍ത്തനത്തിന് നേതൃത്വം നല്‍കി.