പ്രിട്ടോറിയ: എ ടീമുകളുടെ ത്രിരാഷ്ട്ര ഏകദിന പരമ്പരയുടെ ഫൈനലില്‍ ദക്ഷിണാഫ്രിക്ക എയെ ഏഴു വിക്കറ്റിന് തകര്‍ത്ത് ഇന്ത്യ എയ്ക്ക് കിരീടം. ദക്ഷിണാഫ്രിക്ക ഉയര്‍ത്തി 268 റണ്‍സ് വിജയലക്ഷ്യം 19 പന്ത് ബാക്കി നില്‍ക്കെ മൂന്നു വിക്കറ്റ് നഷ്ടത്തില്‍ മറികടക്കുകയായിരുന്നു ഇന്ത്യ.
സഞ്ജു സാംസണ്‍(12) കരുണ്‍ നായര്‍(4) എന്നിവര്‍ക്ക് സ്‌കോര്‍ പിന്തുടരുമ്പോള്‍ അടിതെറ്റിയെങ്കിലും ശ്രേയസ് അയ്യരുടെ(140*) അപരാജിത സെഞ്ച്വറിയാണ് ഇന്ത്യക്ക് തകര്‍പ്പന്‍ ജയം സമ്മാനിച്ചത്. 131 പന്ത് നേരിട്ട താരം 11 ബൗണ്ടറിയും നാലു സിക്‌സറും പറത്തി. വിജയ് ശങ്കര്‍(72) അര്‍ധസെഞ്ച്വറിയുമായി പിന്തുണ നല്‍കി. 86 പന്തില്‍ ഒന്‍പതു ബൗണ്ടറിയടങ്ങുന്നതാണ് താരത്തിന്റെ ഇന്നിങ്‌സ്. മനീഷ് പാണ്ഡെ(32*) ശ്രേയസിനൊപ്പം പുറത്താകാതെ നിന്നു.
നേരത്തെ ടോസ് നേടിയ ഇന്ത്യ ദക്ഷിണാഫ്രിക്കയെ ബാറ്റിങിനയക്കുകയായിരുന്നു. തുടക്കത്തിലെ തകര്‍ച്ചയ്ക്ക് ശേഷം ഫര്‍ഹാന്‍ ബെദര്‍ദീന്‍(101*) ഡ്വയ്ന്‍ പ്രിട്ടോറിയസ്(58) എന്നിവരുടെ ഇന്നിങ്‌സുകളുടെ ബലത്തിലാണ് ദക്ഷിണാഫ്രിക്ക മികച്ച സ്‌കോര്‍ സ്വന്തമാക്കിയത്. 114 പന്തില്‍ നാലു ബൗണ്ടറിയും മൂന്നു സിക്‌സറുമടങ്ങുന്നതാണ് ബെഹദര്‍ദീന്റെ ഇന്നിങ്‌സ്. പ്രിട്ടോറിയസിന്റെ ഇന്നിങ്‌സില്‍ അഞ്ചു ബൗണ്ടറിയും രണ്ടു സിക്‌സറുമുണ്ടായിരുന്നു.