പത്തനംതിട്ട: വര്‍ഗീയത പരസ്യമായി പ്രകടിപ്പിച്ച വെള്ളാപ്പള്ളി നടേശന്റെ സര്‍ട്ടിഫിക്കറ്റ് തനിക്ക് ആവശ്യമില്ലെന്ന് പ്രതിപക്ഷ ഉപനേതാവ് ഡോ.എം.കെ മുനീര്‍. യൂത്ത് ലീഗ് യുവജന യാത്രക്ക് പത്തനംതിട്ടയില്‍ നല്‍കിയ സ്വീകരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. തന്നെ അല്‍പ്പനെന്ന് വിളിച്ച വെള്ളാപ്പള്ളി നടേശന് ആ വിശേഷണം സ്വര്‍ണ്ണത്തളികയില്‍ അല്‍പം പഞ്ചസാരയും വിതറി തിരിച്ചേല്‍പ്പിക്കുന്നു.
വനിതാ മതിലിന് സര്‍ക്കാര്‍ പണം കൊടുക്കില്ലെന്ന് മുഖ്യമന്ത്രി നിയമസഭയിലും 50 കോടി വകയിരുത്തിയെന്ന് അഡ്വക്കേറ്റ് ജനറല്‍ കോടതിയിലും പറയുന്നു. ഇതില്‍ ഏതാണ് ശരിയെന്ന് മുഖ്യമന്ത്രി വ്യക്തമാക്കണം. വനിതാ മതിലിനായി ആയിരം വീടുകള്‍ നിര്‍മിക്കാവുന്ന 50 കോടി രൂപയാണ് സര്‍ക്കാര്‍ പാഴാക്കുന്നത്. നികുതി പണം കൊണ്ട് പ്രളയത്തില്‍ തകര്‍ന്ന കേരളത്തെ കെട്ടിപ്പടുക്കുന്നതിനു പകരം രാഷ്ട്രീയ ലക്ഷ്യത്തോടെ പണം ധൂര്‍ത്തടിക്കുകയാണ്.
കോഴിക്കോട് മാന്‍ഹോളില്‍ അകപ്പെട്ടവരെ രക്ഷിക്കാന്‍ ഇറങ്ങി മരിച്ച സി.ഐ.ടി.യു അനുഭാവിയായ നൗഷാദിന് ഉമ്മന്‍ചാണ്ടി സര്‍ക്കാര്‍ ധനസഹായം നല്‍കിയപ്പോള്‍ വര്‍ഗീയവിഷം തുപ്പിയ വെള്ളാപ്പള്ളി നടേശനും ബാബരി മസ്ജിദ് പൊളിച്ച കര്‍സേവകനായ സുഗുണനും നേതൃത്വം നല്‍കുന്ന മതിലിനെ വര്‍ഗീയ മതിലെന്നല്ലാതെ എന്തു വിളിക്കും. മന്നത്ത് പത്മനാഭന്‍ എന്ന നവോത്ഥാന നായകനെ പോലും വെള്ളാപ്പള്ളി പറയുന്നതിന് അനുസരിച്ച് മുഖ്യമന്ത്രി പിണറായി വിജയന്‍ അവഹേളിക്കുന്നു.
എന്‍.എസ്.എസിനെ ആക്ഷേപിച്ച് വെള്ളാപ്പള്ളിയെ മഹത്വവല്‍ക്കരിച്ച് സാമുദായിക സംഘടനകള്‍ക്കിടയില്‍ വിഭാഗീയത ശക്തമാക്കാനാണ് സി.പി.എം ശ്രമിക്കുന്നത്. മുസ്‌ലിം ലീഗിനെതിരേ ഇ.എം.എസ് മുതല്‍ പല സി.പി.എമ്മുകാരും വര്‍ഗീയത ആരോപിച്ചതാണ്. തങ്ങള്‍ അതിനെ സഹിഷ്ണുതയോടെ നേരിട്ടു.
എന്നാല്‍ ഇപ്പോള്‍ അവര്‍ക്ക് ഹാലിളകുന്നു. വനിതകളെ ഭീഷണിപ്പെടുത്തി അടുക്കളയില്‍ നിന്ന് തെരുവിലേക്ക് കൊണ്ടുപോകുകയാണ്. വനിതാ മതിലില്‍ പങ്കെടുക്കാന്‍ ആശാവര്‍ക്കര്‍മാരെയും കുടുംബശ്രീക്കാരെയും തൊഴിലുറപ്പ് തൊഴിലാളികളെയും ഭീഷണിപ്പെടുത്തുന്നുവെന്നും മുനീര്‍ പറഞ്ഞു.