തലശ്ശേരി: തൃപ്പങ്ങോട്ടൂര്‍ പഞ്ചായത്തിലെ പാത്തിക്കല്‍ പ്രദേശത്തെ അനധികൃത ക്വാറിയില്‍ നിന്ന് കരിങ്കല്ലുകള്‍ മോഷണം പോകുന്നതായി ജില്ലാ ലീഗല്‍ സര്‍വിസ് അതോറിറ്റിക്കും ജില്ലാ പൊലിസിനും പരാതി. ജനകീയ വേദിയാണ് ഇതു സംബന്ധിച്ച് പരാതി നല്‍കിയത്. അനധികൃത ക്വാറിയില്‍ നിന്ന് കരിങ്കല്ല് കടത്തുന്നുവെന്ന് ജനകീയ വേദി നിരവധി പരാതികള്‍ നല്‍കിയിരുന്നു. പാത്തിക്കലിലെ അനധികൃത ക്വാറി പരിസരത്ത് ക്യാമറ സ്ഥാപിക്കണമെന്ന് ജില്ലാ പൊലിസ് ചീഫിന് നേരത്തെ ജില്ലാ കലക്ടര്‍ നിര്‍ദേശം നല്‍കിയിരുന്നു. എന്നാല്‍ ഇതുവരെ നടപടി സ്വീകരിച്ചില്ലെന്നും പരാതിയില്‍ പറയുന്നു. ഇവിടെ ചെക്ക്‌പോസ്റ്റ് സ്ഥാപിക്കുമെന്ന് പറഞ്ഞെങ്കിലും അതും നടപ്പിലായില്ല.