തൃപ്പൂണിത്തുറ: നഗരമധ്യത്തില്‍ കടയുടമയെ കബളിപ്പിച്ച് അഞ്ചരലക്ഷം രൂപയടങ്ങിയ ബാഗ് കവര്‍ച്ച ചെയ്ത കേസിലെ പ്രതിയെ ഒന്നര വര്‍ഷത്തിന് ശേഷം പോലീസ് പിടികൂടി. മൂവാറ്റുപുഴ പെരിയപ്പുരം ചേറ്റിനാട് വീട്ടില്‍ ഹനീഫ(47)ആണ് പിടിയിലായത്.
2015 ഡിസംബര്‍ 14 ന് രാവിലെ എട്ടരയോടെയായിരുന്നു കവര്‍ച്ച   നടന്നത്. മൂവാറ്റുപുഴ വാഴക്കുളത്ത് കഴിഞ്ഞ ദിവസം സമാനരീതിയില്‍ കവര്‍ച്ച  നടത്തിയതിനു ഹനീഫ പിടിയിലായിരുന്നു. തുടര്‍ന്ന്  പൊലിസ് നടത്തിയ ചോദ്യം ചെയ്യലില്‍  അന്വേഷണത്തില്‍ തൃപ്പൂണിത്തുറയിലെ കടയില്‍ നിന്നും ഒന്നര വര്‍ഷം മുമ്പ്  നടത്തിയ കവര്‍ച്ചയുടെ കാര്യവും പ്രതി പൊലിസിനോട് സമ്മതിക്കുകയായിരുന്നു. തുടര്‍ന്ന്  ഇന്നലെ തൃപ്പൂണിത്തുറ സി.ഐ.ഷിജു, എസ്.ഐ സനല്‍ എന്നിവരുടെ നേതൃത്വത്തില്‍ പോലീസ് പ്രതിയെ അറസ്റ്റ്‌ചെയ്യുകയായിരുന്നു. ഇന്ന് പ്രതിയെ കോടതിയില്‍ ഹാജരാക്കും.