മലപ്പുറം: ജില്ലയില്‍ സ്വാന്ത്ര്യദിനാഘോഷ പരിപാടികളുടെ ഭാഗമായി നടക്കുന്ന വര്‍ണാഭമായ പരേഡ് ഇന്നു രാവിലെ 8.30 മുതല്‍ എം.എസ്.പി ഗ്രൗണ്ടില്‍ നടക്കും. മുഖ്യാതിഥിയായി പട്ടികജാതി-വര്‍ഗ, സാംസ്‌കാരിക വകുപ്പ് മന്ത്രി എ.കെ ബാലന്‍ പങ്കെടുക്കും.
സേനകളുടെ പരേഡില്‍ സല്യൂട്ട് സ്വീകരിച്ചു മന്ത്രി സ്വാതന്ത്ര്യദിന സന്ദേശം നല്‍കും. ഹരിതകേരളാ മിഷന്‍ പദ്ധതിയുടെ ഭാഗമായുള്ള മാലിന്യത്തില്‍നിന്നു സ്വാതന്ത്ര്യം പ്രതിജ്ഞയും മന്ത്രി നിര്‍വഹിക്കും. പരേഡിനു മുന്നോടിയായി വിശിഷ്ടാതിഥി സിവില്‍ സ്റ്റേഷനിലെ വാര്‍ മെമ്മോറിയലില്‍ പുഷ്പാര്‍ച്ചന നടത്തും. തുടര്‍ന്നായിരിക്കും പരേഡ് ഗ്രൗണ്ടിലേക്കു പുറപ്പെടുക. പരേഡിന് എം.എസ്.പി അസിസ്റ്റന്റ് കമാന്‍ഡന്റ് സി.വി ശശി നേത്യത്വം നല്‍കും. സായുധ പൊലിസിലെ കെ. രാജേഷ് സെക്കന്‍ഡ്-ഇന്‍ കമാന്‍ഡന്റാകും.
പരേഡിനു മുന്നോടിയായി രാവിലെ 6.45നു മുനിസിപ്പല്‍ പ്രദേശത്തെ സ്‌കൂളുകളെ പങ്കെടുപ്പിച്ചു സിവില്‍ സ്റ്റേഷന്‍ പരിസരത്തുനിന്നു പരേഡ് ഗ്രൗണ്ടിലേക്ക് പ്രഭാത ഭേരി നടത്തും. ഇതില്‍ മികച്ച പ്രദര്‍ശനം നടത്തുന്ന സ്‌കൂളുകള്‍ക്കു ട്രോഫികള്‍ വിതരണം ചെയ്യും. പരേഡിനു ശേഷം പൊലിസിന്റെ വനിതാ സെല്‍ സ്ത്രീ ശാക്തീകരണത്തിന്റെ ഭാഗമായി നടത്തുന്ന ഡിഫന്‍സ് പ്രോഗ്രാമും നടക്കും.