കോഴിക്കോട്: കെ.ടി.ഡി.സി കോഴിക്കോട്ട് 55 കോടി രൂപ മുതല്‍ മുടക്കില്‍ പഞ്ചനക്ഷത്ര ഹോട്ടല്‍ നിര്‍മിക്കുന്നു. വെസ്റ്റ്ഹില്‍ ബീച്ചില്‍ കേരള സ്റ്റേറ്റ് ഹോസ്പിറ്റാലിറ്റി മാനേജ്‌മെന്റ് ഇന്‍സ്റ്റിറ്റ്യൂട്ടിന്റെ പുതിയ കെട്ടിടത്തിനു സമീപത്തുള്ള ഒരേക്കര്‍ സ്ഥലത്താണ് ഹോട്ടല്‍ നിര്‍മിക്കുന്നത്. ഹോട്ടല്‍ നിര്‍മിക്കാനുദ്ദേശിക്കുന്ന സ്ഥലം കെ.ടി.ഡി.സി ചെയര്‍മാന്‍ എം. വിജയകുമാര്‍ സന്ദര്‍ശിച്ചു. ഒരു വര്‍ഷത്തിനുള്ളില്‍ ഹോട്ടല്‍ നിര്‍മാണം ആരംഭിക്കുമെന്ന് അദ്ദേഹം പറഞ്ഞു. പദ്ധതിക്ക് ഭരണാനുമതി ലഭിച്ചതായും കിഫ്ബിയില്‍ നിന്ന് കെ.ടി.ഡി.സിക്ക് അനുവദിച്ചിട്ടുള്ള 100 കോടി രൂപയില്‍ 55 കോടി രൂപയും പഞ്ചനക്ഷത്ര ഹോട്ടലിനായി ചെലവഴിക്കുമെന്നും അദ്ദേഹം പറഞ്ഞു.
പഞ്ചനക്ഷത്ര ഹോട്ടല്‍ ഇല്ലെന്നുള്ളത് ടൂറിസം രംഗത്ത് വലിയ വെല്ലുവിളിയാണെന്ന് അദ്ദേഹം വ്യക്തമാക്കി. എ. പ്രദീപ്കുമാര്‍ എം.എല്‍.എ, കെ.ഡി.ടി.സി ഡയറക്ടര്‍ ഡോ. എ.വി പ്രകാശ്, റീജ്യനല്‍ മാനേജര്‍ എം.എസ് പ്രദീപ് എന്നിവരും ഒപ്പമുണ്ടായിരുന്നു.