ആലുവ: നടി ആക്രമിക്കപ്പെട്ട കേസില്‍ ജയിലില്‍ കഴിയുന്ന ദിലീപിനെ നടനും എം.എല്‍.എയുമായ ഗണേഷ് കുമാര്‍ ജയിലില്‍ സന്ദര്‍ശിച്ചു. കോടതി വിധിക്കും വരെ ദിലീപ് കുറ്റവാളിയല്ല. ഇത്തരമൊരു സാഹചര്യത്തില്‍ താന്‍ അദ്ദേഹത്തെ തള്ളിപ്പറയില്ല. ദിലീപിന്റെ നല്ല കാലത്ത് ഔദാര്യം പറ്റിയവരാണ് ആപത്ത് വന്നപ്പോള്‍ തള്ളിപ്പറയുന്നവര്‍. താന്‍ ഒരു എം.എല്‍.എ ആയിട്ടല്ല, മറിച്ച് സുഹൃത്ത് എന്ന നിലയിലാണ് അദ്ദേഹത്തെ സന്ദര്‍ശിച്ചിട്ടുള്ളതെന്നും ഗണേഷ് കുമാര്‍ പറഞ്ഞു.

സിനിമയില്‍ ദിലീപിന്റെ ഉപകാരങ്ങള്‍ സ്വീകരിച്ചിട്ടുള്ളവരാണ് പലരും. പൊലിസ് ചോദ്യം ചെയ്യുമെന്നോ, ഫോണ്‍ കോളുകള്‍ ചോര്‍ത്തുമെന്നോ ഭയന്ന് അദ്ദേഹത്തെ പിന്തുണയ്ക്കാതിരിക്കരുതെന്നും ഗണേഷ് കുമാര്‍ പറഞ്ഞു. കോടതി കുറ്റവാളിയാണെന്ന് കണ്ടെത്തുന്നത് വരെ അദ്ദേഹത്തോടൊപ്പം നില്‍ക്കണം. കുറ്റക്കാരനാണെന്ന് കോടതി സ്ഥിരീകരിക്കാത്ത ഒരാളെ കുറ്റവാളിയായി മുദ്രകുത്താന്‍ ആര്‍ക്കും അവകാശമില്ലെന്നും ഗണേശ് കൂട്ടിച്ചേര്‍ത്തു.

പൊലിസ് കെട്ടിച്ചമയ്ക്കുന്ന കഥകളുടെ തിക്തഫലം അടുത്തകാലം വരെ അനുഭവിച്ച വ്യക്തിയാണ് മുഖ്യമന്ത്രി പിണറായി വിജയന്‍. കേസിന്റെ അന്വേഷണം ശരിയായ വഴിക്കല്ലെന്ന് താന്‍ പറയുന്നില്ല. എന്നാല്‍, പൊലിസിന് തെറ്റ് പറ്റിയിട്ടുണ്ടെങ്കില്‍ തീര്‍ച്ചയായും അത് മുഖ്യമന്ത്രി തിരുത്തണമെന്നും അദ്ദേഹം പറഞ്ഞു. ദിലീപിനെ ആലുവ സബ് ജയിലില്‍ സന്ദര്‍ശിച്ച ശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു ഗണേഷ് കുമാര്‍ എം.എല്‍.എ.