ഹരിപ്പാട്: വീയപുരം പാലത്തിനോട് ചേര്‍ന്നുള്ള റോഡിന്റെ ഇരുവശങ്ങളിലും രക്ഷാകവചമില്ലാത്തത് അപകട സാധ്യത വര്‍ധിപ്പിക്കുന്നു.ഇതോടെ ഇതുവഴിയുള്ള യാത്രക്കാര്‍ അപകട ഭീഷണിയിലാണ്. ദിവസവും നൂറുകണക്കിന് വാഹനങ്ങള്‍ സഞ്ചരിക്കുന്ന വളരെ തിരക്കേറിയ റോഡിലാണ് രക്ഷാകവചമില്ലാത്തത്.
കുത്തനെയുള്ള റോഡിന്റെ ഇരുവശങ്ങളിലും രക്ഷാകവചം നിര്‍മിക്കണമെന്നാണ് ചട്ടം. എന്നാല്‍ ആവശ്യമായ നടപടികള്‍ എടുക്കാതെ ചട്ടങ്ങള്‍ കാറ്റില്‍ പറത്തുകയാണ് അധികൃതര്‍. ഇരതോട്,വീയപുരം,അക്കര മുറിഞ്ഞപുരക്കല്‍,പായിപ്പാട്,തുരുത്തേല്‍,വള്ളക്കാലില്‍എന്നീ പാലങ്ങളാണിവിടെയുള്ളത്. ഇതില്‍ നിന്നുമുള്ള റോഡുകളുടെ ഇരുവശങ്ങളിലുമാണ് രക്ഷാകവചമില്ലാത്തത്.
റോഡിന്റെ മുകള്‍ ഭാഗം മുതല്‍ താഴെ തട്ടുവരെ 25 അടിയോളം താഴ്ചയുണ്ട്. റോഡിന്റെ ഇരുവശങ്ങളാകട്ടെ പാഴ്‌ചെടികള്‍ കൊണ്ടു നിറഞ്ഞ് കാടുകളുമായി. എടത്വ പൊതുമരാമത്ത് വകുപ്പിന്റെ പരിധിയിലാണ് ഈ പ്രദേശം.
സ്‌കൂള്‍ കുട്ടികളുമായി നിരവധി ബസുകള്‍ കടന്നുപോകുന്നതും ഈ റോഡുകളിലൂടെയാണ്. ഇവിടുത്തെ പാലങ്ങളും അപകഭീഷണിയിലാണ് അനധികൃത മണല്‍ വാരലും, പാലങ്ങളുടെ കാലപഴക്കവും നിര്‍മാണത്തിലെ അപാകതയും കാരണം പാലങ്ങളുടെ ഇരുകരകളിലേയും കരിങ്കല്‍ ഭിത്തികള്‍ പൊട്ടിപൊളിഞ്ഞ നിലയിലുമാണ്.
മേല്‍പാടം വഴി മാന്നാര്‍ ചെങ്ങന്നൂര്‍ ഭാഗത്തേക്കും തേവേരി പാണ്ടനാട് വഴി ചെങ്ങന്നൂര്‍ ഭാഗത്തേക്കും,കടപ്ര,നിരണംവഴി തിരുവല്ല,ചങ്ങനാശ്ശേരി ഭാഗത്തേക്കും മുള്ള ബസ് സര്‍വിസ് നടക്കുന്നതും തിരക്കുള്ള ഈറോഡിലൂടെയാണ്. കെ.എസ്.ആര്‍.ടി.സി ബസുകളും,സ്വകാര്യ ബസുകളും ഇതുവഴിയാണ് കടന്നുപോകുന്നത്. ഹരിപ്പാട് നിന്ന് എടത്വ,തിരുവല്ല ചങ്ങനാശ്ശേരി,കോട്ടയം,കുമളി ഭാഗങ്ങളിലേക്ക് കെ.എസ്.ആര്‍.ടീസി സര്‍വിസ് നടത്തുന്നതും ഇതുവഴിയാണ്.
തീര്‍ഥാടന കേന്ദ്രങ്ങളായ എടത്വ പള്ളി,ചക്കുളത്തുകാവ് ക്ഷേത്രം എന്നിവിടങ്ങളിലേക്ക് പെട്ടെന്ന ്എത്തിച്ചേരാന്‍ കഴിയുന്നതും ഈറോഡിലൂടെയാണ്. രാത്രികാലങ്ങളില്‍ അപരിചിതര്‍ അപകടത്തില്‍ പെടാറുള്ളത് പതിവ് കാഴ്ചയാണെന്ന് പ്രദേശവാസികള്‍ പറയുന്നു.