മണ്ണഞ്ചേരി: ഓണാഘോഷത്തിനിടയില്‍ വ്യാപക അക്രമം. ചെട്ടികാട്,കാട്ടൂര്‍,പൂങ്കാവ്,തുമ്പോളി,കൊമ്മാടി എന്നിവിടങ്ങളിലാണ് ആഘോഷങ്ങള്‍ അക്രമത്തില്‍ കലാശിച്ചത്. ഗ്രന്ഥശാലകളുടേയും, സാംസ്‌ക്കാരിക സംഘടനകളുടേയും ആഘോഷവേദികളാണ് സംഘര്‍ഷകേന്ദ്രങ്ങളായി മാറിയത്. തുമ്പോളിപള്ളിക്കു സമീപം കലാകൈരളി വായനശാലയില്‍ നടന്ന ഓണാഘോഷപരിപാടിക്കിടെയുണ്ടായ അക്രമത്തില്‍ രണ്ട് പൊലിസുകാര്‍ക്ക് വെട്ടേറ്റു.
പരിപാടിക്ക് തടസം ഉണ്ടാക്കിയ സംഘത്തിലെ ഒരാളെ പിടികൂടി ജീപ്പില്‍ കയറ്റുന്നതിനിടയിലാണ് പൊലിസുകാരെ അക്രമിച്ചത്. സംഭവസ്ഥലത്തുനിന്നും പൊലിസ് പിടികൂടിയാളെ അക്രമിസംഘം മോചിപ്പിക്കുകയായിരുന്നു. ഇവിടെ മദ്യപസംഘം ഓണാഘോഷപരിപാടി തടസപ്പെടുത്തുന്ന വിവരം അറിഞ്ഞ് നാലംഗ പൊലിസ് സേനയാണ് കലാകൈരളി വായനശാലയില്‍ എത്തിയത്. എന്നാല്‍ അക്രമിസംഘത്തിന് അംഗബലം കൂടുതലായിരുന്നു.
കൊമ്മാടി യുവജനവായനശാലയില്‍ തലയണയടി മത്സരം നടക്കുമ്പോള്‍ ഉണ്ടായ തര്‍ക്കമാണ് സംഘര്‍ഷത്തില്‍ കലാശിച്ചത്. മത്സരത്തിനിടയില്‍ സംഘാടകരും കാണാനെത്തിയവരും തമ്മിലുള്ള തര്‍ക്കം നടന്നിരുന്നു. പിരിഞ്ഞുപോയ സംഘം കൂടുതല്‍ ആളുകളുമായി പരിപാടി നടക്കുന്ന സ്ഥലത്തെത്തുകയും തിരുവാതിര കളി അലങ്കോലപ്പെടുത്തുകയുമായിരുന്നു. ഇതിനെ സംഘാടകര്‍ ചോദ്യംചെയ്തപ്പോള്‍ ആയുധങ്ങള്‍ ഉപയോഗിച്ച് അക്രമം നടത്തുകയായിരുന്നു. അക്രമത്തില്‍ മൂന്നോളം പേര്‍ക്ക് പരുക്കേറ്റു.
തലയ്ക്കും കൈകാലുകള്‍ക്കും പരുക്കേറ്റവരെ ആലപ്പുഴ ജനറല്‍ ആശുപത്രിയില്‍ പ്രവേശിപ്പിച്ചു. പൂങ്കാവില്‍ നടന്ന ഓണാഘോഷത്തിനിടയില്‍ രണ്ടുപേര്‍ക്ക് കുത്തേറ്റു. ഓണാഘോഷം തടസപ്പെടുത്താന്‍ ലഹരി വില്‍പ്പനസംഘം ശ്രമിച്ചതാണ് പൂങ്കാവില്‍ സംഘര്‍ഷത്തിന് കാരണം. ഇവിടേയും ഒരു പൊലിസുകാരന് പരുക്കേറ്റിട്ടുണ്ട്. ചെട്ടികാട് ഉദയാ വായനശാലയിലെ ഓണാഘോഷത്തിനിടയിലെ തര്‍ക്കം വായനശാലാപ്രവര്‍ത്തകന്‍ ഉണ്ണിയുടെ വീടുതകര്‍ത്തു. ക്വിസ് മത്സരം നടക്കുമ്പോള്‍ ഇരുചക്രവാഹനത്തില്‍ ഇതുവഴിയെത്തിയ മൂന്നംഗസംഘം മത്സരത്തിന് തടസമുണ്ടാക്കുന്ന തരത്തില്‍ പ്രവര്‍ത്തിച്ചത് ചോദ്യംചെയ്തതാണ് ഇവിടെ വീടാക്രമണത്തില്‍ കലാശിച്ചത്.
മാരാരിക്കുളം തെക്ക് പഞ്ചായത്തില്‍ 14ാം വാര്‍ഡില്‍ വെളിയില്‍ പ്രസന്നയുടെ വീടാണ് അക്രമികള്‍ തകര്‍ത്തത്. അക്രമം നടക്കുമ്പോള്‍ പ്രസന്നയും ബിരുദ വിദ്യാര്‍ഥിയായ മകളും മാത്രമെ വീട്ടിലുണ്ടായിരുന്നുള്ളു. വീടുതകര്‍ക്കുന്നതുകണ്ട് തടസപ്പെടുത്താനെത്തിയ പ്രസന്നയുടെ മകളെ അക്രമികള്‍ വാള്‍ കഴുത്തില്‍വച്ച് ഭീഷണിപ്പെടുത്തി.
ആറംഗസംഘം ഇരുചക്രവാഹനത്തിലെത്തിയായിരുന്നു ഇവിടെ അക്രമം നടത്തിയത്. സംഭവത്തിനുശേഷം അമിതവേഗത്തില്‍ വാഹനത്തില്‍ പാഞ്ഞ സംഘത്തിന്റെ ഒരു ഇരുചക്രവാഹനം മറിഞ്ഞ് ഒരാള്‍ക്ക് പരുക്കേറ്റു. ഇയാളെ നാട്ടുകാര്‍ പിടികൂടി മണ്ണഞ്ചേരി പൊലിസിനുകൈമാറി. കാട്ടൂര്‍ ഗുരുമന്ദിരം മൈതാനിയിലെ ഓണാഘോഷത്തിനിടയില്‍ മദ്യപസംഘം തീരദേശപാതയിലൂടെയെത്തിയ ഇരുചക്രവാഹന യാത്രക്കാരെ അക്രമിച്ചു. സംഭവം അറിഞ്ഞ് നാട്ടുകാര്‍ സംഘടിച്ച് അക്രമികളെ തുരത്തി.