ന്യൂഡല്‍ഹി: ബി.ജെ.പിക്ക് സി.പി.എം നല്‍കിയ സംഭാവനയാണ് കേന്ദ്രമന്ത്രി അല്‍ഫോണ്‍സ് കണ്ണന്താനമെന്ന് കെ.പി.സി.സി അധ്യക്ഷന്‍ എം.എം ഹസന്‍. ഇന്നലെവരെ ഇടതുപക്ഷത്തിന്റെ എം.എല്‍.എയായിരുന്നു കണ്ണന്താനത്തെ ബി.ജെ.പി ദത്തെടുത്ത് മന്ത്രിയാക്കിയപ്പോള്‍ മുഖ്യമന്ത്രി പിണറായി വിജയന്‍ നല്‍കിയ സ്‌നേഹവും വിരുന്നും കാണുമ്പോള്‍ ബി.ജെ.പി പഴയ സി.പി.എമ്മുകാരന് നല്‍കിയ അംഗീകാരമാണോയെന്ന് സംശയിക്കുന്നു.
ബി.ജെ.പിയിലേക്ക് ഇതുപോലെ ഇനിയും ആളുകളെ സി.പി.എം റിക്രൂട്ട് ചെയ്യുമോയെന്നും അദ്ദേഹം ചോദിച്ചു.
കേന്ദ്രസംസ്ഥാന സര്‍ക്കാരുകളുടെ അനാസ്ഥ കാരണം സംസ്ഥാനത്ത് ഓണക്കാലത്ത് വിലക്കയറ്റം രൂക്ഷമായിരുന്നു. ഇതോടെ സാധാരണക്കാരായ ജനങ്ങള്‍ ദുരിതത്തിലായി. ഇടതു സര്‍ക്കാര്‍ മദ്യം സുലഭമായി ഒഴുക്കിയെന്നല്ലാതെ വിലക്കയറ്റത്തില്‍ പൊറുതിമുട്ടിയ സാധാരണക്കാരായ ജനങ്ങളെ രക്ഷിക്കാന്‍ ഒരു സഹായവും ചെയ്തിട്ടില്ല. എല്ലാ റേഷന്‍കാര്‍ഡ് ഉടമകള്‍ക്കും അഞ്ചുകിലോ ധാന്യവും പഞ്ചസാരയും നല്‍കുമെന്ന് പറഞ്ഞ ഇടതുസര്‍ക്കാരിന് വാക്കുപാലിക്കാന്‍ സാധിച്ചില്ല. കഴിഞ്ഞ യു.ഡി.എഫ് സര്‍ക്കാരിന്റെ കാലത്ത് എല്ലാ ബി.പി.എല്‍ കാര്‍ഡ് ഉടമകള്‍ക്കും സൗജന്യ കിറ്റ് നല്‍കിയിരുന്നുവെന്നും അദ്ദേഹം പറഞ്ഞു.