ലണ്ടന്‍: ഇംഗ്ലണ്ടിനെതിരായ മൂന്നാം ക്രിക്കറ്റ് ടെസ്റ്റില്‍ വെസ്റ്റിന്‍ഡീസ് പൊരുതുന്നു. ആദ്യ ഇന്നിങ്‌സില്‍ 123 റണ്‍സിന് പുറത്തായ അവര്‍ ഇംഗ്ലണ്ടിനെ 194 റണ്‍സില്‍ കൂടാരം കയറ്റി.
രണ്ടാം ഇന്നിങ്‌സ് തുടങ്ങിയ വിന്‍ഡീസ് ഒടുവില്‍ വിവരം കിട്ടുമ്പോള്‍ ഒരു വിക്കറ്റ് നഷ്ടത്തില്‍ 11 റണ്‍സെന്ന നിലയില്‍. ഒന്‍പത് വിക്കറ്റുകള്‍ ശേഷിക്കേ ഇംഗ്ലണ്ടിന്റെ സ്‌കോറിനൊപ്പമെത്താന്‍ അവര്‍ക്ക് 60 റണ്‍സ് കൂടി.
മികച്ച സ്‌കോര്‍ സ്വന്തമാക്കമെന്ന ലക്ഷ്യവുമായി ബാറ്റിങിനിറങ്ങിയ ഇംഗ്ലണ്ട് തുടക്കത്തില്‍ തന്നെ തകര്‍ന്നു. 63 റണ്‍സെടുക്കുന്നതിനിടെ അഞ്ച് വിക്കറ്റ് നഷ്ടമായ അവരെ ബെന്‍ സ്റ്റോക്‌സിന്റെ 60 റണ്‍സാണ് രക്ഷിച്ചത്. നേരത്തെ വിന്‍ഡീസിന്റെ ആറ് വിക്കറ്റുകള്‍ പിഴുത് ബൗളിങിലും തിളങ്ങിയ സ്റ്റോക്‌സ് ഓള്‍റൗണ്ട് മികവ് പുറത്തെടുത്തു.
വാലറ്റത്ത് സ്റ്റുവര്‍ട് ബ്രോഡ് 38 റണ്‍സെടുത്ത് ഇംഗ്ലണ്ടിന് നേരിയ ലീഡ് സമ്മാനിച്ചു. വിന്‍ഡീസ് നിരയില്‍ കെമര്‍ റോച്ച് അഞ്ചും ക്യാപ്റ്റന്‍ ജെയ്‌സന്‍ ഹോള്‍ഡര്‍ നാലും ഗബ്രിയേല്‍ ഒരു വിക്കറ്റും വീഴ്ത്തി ഇംഗ്ലീഷ് തകര്‍ച്ച എളുപ്പമാക്കി.