മട്ടാഞ്ചേരി: ഇടവേളക്ക് ശേഷം മട്ടാഞ്ചേരിയില്‍ എക്‌സൈസിന്റെ നേതൃത്വത്തില്‍ വന്‍ കഞ്ചാവ് വേട്ട.അഞ്ച് കിലോ കഞ്ചാവുമായാണ് എക്‌സൈസ് സംഘം രണ്ട് പേരെ അറസ്റ്റ് ചെയ്തത്.
കൂവപ്പാടം സ്വദേശികളായ സുനില്‍(45),ശശികുമാര്‍(51)എന്നിവരെയാണ് മട്ടാഞ്ചേരി റെയിഞ്ച് എക്‌സൈസ് ഇന്‍സ്‌പെക്ടര്‍ സുനില്‍ രാജിന്റെ നേതൃത്വത്തിലുള്ള സംഘം അറസ്റ്റ് ചെയ്തത്.കൊച്ചിന്‍ കോളേജിന്റെ പരിസരത്ത് താമസിക്കുന്ന പ്രതികള്‍ കഴിഞ്ഞ കുറേ നാളുകളായി വിദ്യാര്‍ഥികളേയും യുവാക്കളേയും കേന്ദ്രീകരിച്ച് കഞ്ചാവ് വില്‍പ്പന നടത്തി വരികയായിരുന്നുവെന്ന വിവരം എക്‌സൈസിന് ലഭിച്ചിരുന്നു.ഇതിനെ തുടര്‍ന്ന് ഇവര്‍ എക്‌സൈസ് സംഘത്തിന്റെ നിരീക്ഷണത്തിലായിരുന്നു.
മട്ടാഞ്ചേരി,ഫോര്‍ട്ട്‌കൊച്ചി,തോപ്പുംപടി മേഖലയില്‍ കഞ്ചാവ് വില്‍പ്പന നടത്തുന്ന സംഘത്തിലെ മുഖ്യ കണ്ണികളാണ് പിടിയിലായവരെന്ന് എക്‌സൈസ് അധികൃതര്‍ വ്യക്തമാക്കി.
ഇവരെ ചോദ്യം ചെയ്തതില്‍ നിന്ന് സംഘത്തില്‍ നിരവധി പേരുണ്ടെന്ന സൂചനയും എക്‌സൈസിന് ലഭിച്ചിട്ടുണ്ട്.ഇവര്‍ക്കായുള്ള തിരച്ചിലും ആരംഭിച്ചിട്ടുണ്ട്.ആവശ്യക്കാര്‍ക്ക് അളവ് അനുസരിച്ച് കഞ്ചാവ് എത്തിച്ച് നല്‍കുകയെന്നതാണ് ഇവരുടെ രീതി.ഇതിനായി അമ്പത്,നൂറ്,250,500ഗ്രാം എന്നിങ്ങനെ വ്യത്യസ്ത പൊതികളിലാക്കിയാണ് ഇവര്‍ കഞ്ചാവ് സൂക്ഷിച്ചിരുന്നത്.
ആക്ടീവ സ്‌ക്കൂട്ടറിലാണ് ഇവര്‍ ആവശ്യക്കാര്‍ക്ക് സാധനം എത്തിച്ച് കൊടുത്തിരുന്നത്.ഇതിന് ഉപയോഗിച്ച വാഹനവും എക്‌സൈസ് പിടിച്ചെടുത്തിട്ടുണ്ട്.ഏറെ നാളത്തെ നിരീക്ഷണത്തിനൊടുവിലാണ് പ്രതികള്‍ എക്‌സൈസിന്റെ വലയിലായത്.പ്രിവന്റീവ് ഓഫീസര്‍മാരായ മൈക്കിള്‍,ഡന്നീസ്,സിവില്‍ എക്‌സൈസ് ഓഫീസര്‍മാരായ സെയ്ദ്,മനീഷ് മോന്‍,സോമന്‍,വനിത സിവില്‍ എക്‌സൈസ് ഓഫിസര്‍ നെസ്ലി എന്നിവരും പരിശോധനയില്‍ പങ്കെടുത്തു.പ്രതികളെ കോടതിയില്‍ ഹാജരാക്കി.