ശ്രീനഗര്‍: സഹാനുഭൂതി, സഹവര്‍ത്തിത്വം, ആശയവിനിമയം, ആത്മവിശ്വാസം എന്നിവയ്ക്ക് മാത്രമേ കശ്മിര്‍ പ്രശ്‌നത്തില്‍ പരിഹാരം കാണാനുള്ള അടിത്തറ രൂപീകരിക്കാനാവുകയുള്ളുവെന്ന് ആഭ്യന്തര മന്ത്രി രാജ്‌നാഥ് സിങ്. പ്രശ്‌നത്തിനു പരിഹാരം കാണാന്‍ ആരുമായും ചര്‍ച്ച നടത്താന്‍ തയ്യാറാണെന്നും അദ്ദേഹം പറഞ്ഞു.

കശ്മിരിലെ പ്രശ്‌നങ്ങള്‍ പരിഹരിക്കാന്‍ സഹായിക്കുന്നതിനായി എല്ലാവരേയും സ്വാഗതം ചെയ്യുന്നതായും അദ്ദേഹം പറഞ്ഞു.

എന്ത് തടസ്സങ്ങളുണ്ടായാലും അതിനെയെല്ലാം തരണം ചെയ്യാന്‍ തയ്യാറാണെന്നും പ്രശ്‌നം പരിഹരിക്കുന്നതിനായി എത്ര തവണ വേണമെങ്കിലും കശ്മിര്‍ സന്ദര്‍ശിക്കാന്‍ തയ്യാറാണെന്നും രാജ്‌നാഥ് സിങ് വ്യക്തമാക്കി.

നാലു ദിവസത്തെ സന്ദര്‍ശനത്തിനായി കശ്മിരിലെത്തിയതാണ് രാജ്‌നാഥ് സിങ്. കഴിഞ്ഞ വര്‍ഷത്തെ അപേക്ഷിച്ച് ഇത്തവണ അവസ്ഥ ഏറെ മെച്ചപ്പെട്ടിട്ടുണ്ടെന്നും കശ്മിരിലെ എല്ലാ മുഖങ്ങളിലും പുഞ്ചിരി കാണാനാണ് താന്‍ ആഗ്രഹിക്കു്‌നതെന്നും അദ്ദേഹം പറഞ്ഞു.