തിരുവനന്തപുരം: ശാസ്തമംഗലം ജങ്ഷനില്‍ വച്ച് ഹൃദയാഘാതം സംഭവിച്ച വൃദ്ധനെ ഉടന്‍ ഹോസ്പിറ്റലിലെത്തിച്ച് രക്ഷകരായി പിങ്ക് പൊലിസ്.
ശാസ്തമംഗലം സ്‌കൂളിന് മുന്‍പില്‍ പട്രോളിങ്ങിലുണ്ടായിരുന്ന വനിതാ പൊലിസുകാരായ മണ്ണന്തല സ്റ്റേഷനിലെ സജിത, പൂന്തുറ സ്റ്റേഷനിലെ വിനീത എന്നിവര്‍ വൈകിട്ട് ഡ്യൂട്ടി കഴിഞ്ഞ് മടങ്ങുന്നതിനിടെ ജങ്ഷനില്‍ വച്ച് റോബിന്‍സ് (62) എന്നയാള്‍ക്ക് നെഞ്ചുവേദന അനുഭവപ്പെടുകയായിരുന്നു. ഉടന്‍ തന്നെ വനിതാ പൊലിസിന്റെ നേതൃത്വത്തില്‍ ഓട്ടോ പിടിച്ച് റോബിന്‍സനെ അടുത്തുള്ള ശ്രീരാമകൃഷ്ണ ഹോസ്പിറ്റലില്‍ എത്തിക്കുകയായിരുന്നു.
ഇവിടെ വച്ച് ഇദ്ദേഹത്തിന് ഹൃദയാഘാതമാണെന്നറിഞ്ഞ് ഡോക്ടര്‍മാര്‍ ഉടന്‍ മെഡിക്കല്‍ കോളജിലെത്തിക്കാനാവശ്യപ്പെട്ടു. ശേഷം കണ്‍ട്രോള്‍ റൂം ആംബുലന്‍സെത്തിച്ച് ഇദ്ദേഹത്തെ തക്ക സമയത്തു തന്നെ മെഡിക്കല്‍ കോളജ് ഹോസ്പിറ്റലിലെത്തിക്കാനായിതിനാല്‍ മരണത്തില്‍ നിന്നും രക്ഷിക്കാനായി.