ചെറുവത്തൂര്‍: മലബാര്‍ ജലോത്സവത്തിനിടെ അച്ചാംതുരുത്തി പാലിച്ചോന്‍ ബോട്ട് ക്ലബിന്റെ അമരക്കാരന്‍ കെ.കെ ദിനേശനെ മര്‍ദിച്ചുവെന്ന കേസില്‍ ഒരാളെ ചന്തേര പൊലിസ് അറസ്റ്റ് ചെയ്തു. അളകേശനാണ് (39) അറസ്റ്റിലായത്. ഇയാളെ ഹൊസ്ദുര്‍ഗ് ഒന്നാം ക്ലാസ് മജിസ്‌ട്രേറ്റ് കോടതി(ഒന്ന്) രണ്ടാഴ്ചത്തേക്ക് റിമാന്‍ഡ് ചെയ്തു. മെട്ടമ്മല്‍ ബ്രദേര്‍ഴ്‌സ് കവ്വായി കായലില്‍ സെപ്റ്റംബര്‍ അഞ്ചിനു സംഘടിപ്പിച്ച മലബാര്‍ ജലോത്സവത്തിനിടയിലാണു ദിനേശനെ മറ്റൊരു തുഴച്ചില്‍ ടീമിലെ അംഗങ്ങള്‍ പങ്കായം കൊണ്ട് അടിച്ചത്. അടിയേറ്റ ദിനേശന്‍ മംഗളൂരു തേജസ്വിനി ആശുപത്രിയില്‍ ചികിത്സയിലായിരുന്നു. മര്‍ച്ചന്റ് നേവി ഉദ്യോഗസ്ഥനായ ദിനേശന്‍ അവധിയില്‍ നാട്ടിലെത്തിയപ്പോഴാണ് വള്ളംകളി മത്സരത്തിനായി പോയത്. അക്രമം നടത്തിയവര്‍ക്കെതിരേ പൊലിസ് നടപടിയെടുത്തില്ലെന്നരോപിച്ച് ക്ലബിന്റെ നേതൃത്വത്തില്‍ കര്‍മ്മ സമിതി രൂപീകരിച്ചു സി.ഐ ഓഫിസ് മാര്‍ച്ച് നടത്താന്‍ തീരുമാനിച്ചിരുന്നു. ഇതിനിടയിലാണ് ഒരാളെ അറസ്റ്റു ചെയ്തത്. നാലു പേര്‍ക്കെതിരേയാണു പരാതി. എന്നാല്‍ ഒരാള്‍കൂടി സംഭവത്തില്‍ ഉള്‍പ്പെട്ടിട്ടുണ്ടെന്നും പ്രതിയെ ഉടന്‍ പിടികൂടുമെന്നും പൊലിസ് പറഞ്ഞു.