താമരശേരി: രണ്ടുദിവസമായി തുടരുന്ന കനത്തമഴയെ തുടര്‍ന്ന് താമരശേരി ചുരം റോഡിലെ ഏഴാം വളവില്‍ റോഡിലെ ടാര്‍ ഒലിച്ചുപോയി. വലിയ ഗര്‍ത്തങ്ങള്‍ രൂപപ്പെട്ടു. ഇതേത്തുടര്‍ന്ന് ഏറെനേരം ഗതാഗതം തടസപ്പെട്ടു. കഴിഞ്ഞദിവസം രാത്രി മരം വീണതിനെ തുടര്‍ന്ന് ചുരം വഴിയുള്ള യാത്രകള്‍ക്ക് നിയന്ത്രണം ഏര്‍പ്പെടുത്തിയിരുന്നു.
മണ്ണിടിച്ചിലിനും മലവെള്ളപ്പാച്ചിലിനും സാധ്യതയുണ്ടെന്ന മുന്നറിയിപ്പുകള്‍ നേരത്തെ നല്‍കിയിരുന്നു. ചിലയിടങ്ങളില്‍ ഉള്‍വനത്തില്‍ ഉരുള്‍പ്പൊട്ടിയെന്ന അഭ്യൂഹം പരന്നു. നേരത്തെ തകര്‍ന്ന ചുരത്തിലെ ആറ്, ഏഴ് വളവുകളിലേക്ക് വെള്ളമൊഴുകിയതാണ് റോഡ് കൂടുതല്‍ തകരാന്‍ കാരണം.
ചുരത്തിലെ വളവുകളില്‍ ഇന്റര്‍ലോക്ക് പതിക്കണമെന്ന ചുരം സംരക്ഷണ സമിതിയുടെ വാദങ്ങള്‍ ഇതോടെ ശക്തിപ്പെടുകയാണ്. ദേശീയപാതാ വിഭാഗം ചുരത്തിലെ റോഡുകളില്‍ അറ്റകുറ്റപ്പണികള്‍ നടത്തുന്നതില്‍ ശ്രദ്ധ കേന്ദ്രീകരിക്കുന്നില്ലെന്ന ആക്ഷേപവും ശക്തമാണ്. ചുരം സംരക്ഷണ സമിതിയുടെ പ്രവര്‍ത്തകരാണ് പലപ്പോഴും റോഡിലെ ചെറിയ കുഴികളും മറ്റും അടക്കുന്നത്. ചുരത്തിലെ പലഭാഗങ്ങളില്‍ നിന്നു മലവെള്ളം താഴേക്കു പതിക്കുന്നതിനാല്‍ ഇതിന്റെ തീവ്രത വര്‍ധിക്കും.
ഈ സാഹചര്യത്തില്‍ ചുരംറോഡിന്റെ അറ്റകുറ്റപ്പണികള്‍ക്ക് താല്‍ക്കാലിക ടീമിനെ നിയോഗിക്കാന്‍ കലക്ടര്‍ പൊതുമരാമത്ത് വകുപ്പിനു നിര്‍ദേശം നല്‍കിയിരുന്നു. അടിവാരം മുതല്‍ ലക്കിടി വരെയുള്ള ഭാഗങ്ങള്‍ അടിയന്തരമായി അറ്റകുറ്റപ്പണികള്‍ നടത്തണമെന്ന് കക്ടറുടെ ഉത്തരവില്‍ നിര്‍ദേശിക്കുന്നുണ്ട്.
അതേസമയം കഴിഞ്ഞ ആഴ്ച മലവെള്ളപ്പാച്ചിലില്‍ കനത്ത നാശനഷ്ടം സംഭവിച്ച അടിവാരം പൊട്ടിക്കയ് പ്രദേശത്ത് വീണ്ടും കനത്ത മലവെള്ളപ്പാച്ചില്‍ തുടരുകയാണ്. പൊട്ടിക്കയ് പുഴ കരകവിഞ്ഞൊഴുകി. പുഴയോരത്തുള്ളവരെ സുരക്ഷിത കേന്ദ്രത്തിലേക്കു മാറ്റിപ്പാര്‍പ്പിച്ചിട്ടുണ്ട്.