കൊച്ചി: യുവനടിയെ ആക്രമിച്ച കേസില്‍ സിനിമാ താരം ദിലീപ് സമര്‍പ്പിച്ച ജാമ്യാപേക്ഷ സെപ്റ്റംബര്‍ 26ന് പരിഗണിക്കാനായി ഹൈക്കോടതി മാറ്റി. നേരത്തെ ജാമ്യാപേക്ഷ പരിഗണിച്ച അതേ ബെഞ്ചു തന്നെയാണ് ഇത്തവണയും പരിഗണിക്കുന്നത്. ഹൈക്കോടതി കഴിഞ്ഞ രണ്ടു തവണ ജാമ്യാപേക്ഷ നിരസിച്ച സാഹചര്യത്തില്‍ എന്തുമാറ്റമുണ്ടായെന്ന് വ്യക്തമാക്കി വിശദീകരണം നല്‍കാന്‍ സിംഗിള്‍ ബെഞ്ച് നിര്‍ദേശവും നല്‍കിയിട്ടുണ്ട്. മുന്‍ ഭാര്യയും നടിയുമായ മഞ്ജുവാര്യര്‍ക്കും എ.ഡി.ജി.പി സന്ധ്യയ്ക്കുമെതിരേ ദിലീപ് ജാമ്യാപേക്ഷയില്‍ ആരോപണം ഉന്നയിച്ചിട്ടുണ്ട്. തനിക്കെതിരേ വ്യക്തിപരമായ വിരോധം ഉള്ളവരാണ് പല ആരോപണത്തിനും പിന്നില്‍. നടിയെ ആക്രമിച്ച കേസില്‍ ഗൂഢാലോചനയുണ്ടെന്ന് ആദ്യം പറഞ്ഞത് നടി മഞ്ജു വാര്യരാണ്. ലിബര്‍ട്ടി ബഷീര്‍ ഉള്‍പ്പെടെയുള്ള ശത്രുക്കള്‍ തനിക്കെതിരേ വ്യാജ പ്രചാരണം നടത്തി. തന്റെ വിവാഹ മോചന ഹരജിയില്‍ പരാമര്‍ശിച്ചിട്ടുള്ള പരസ്യ ചിത്ര സംവിധായകന്‍ ശ്രീകുമാര്‍ മേനോന്‍ മാധ്യമങ്ങളില്‍ ഇത്തരം വ്യാജ വാര്‍ത്തകള്‍ വരാന്‍ പ്രയത്‌നിച്ചിട്ടുണ്ട്. ശ്രീകുമാര്‍ മേനോന്റെ ആദ്യ സിനിമയുടെ നിര്‍മാണത്തില്‍നിന്ന് മുംബൈ ഗ്രൂപ്പ് പിന്മാറിയത് താന്‍ നിമിത്തമാണെന്ന ധാരണയില്‍ അയാള്‍ക്ക് ശത്രുതയുണ്ട്.
തന്റെ ആദ്യഭാര്യയായ നടിക്ക് അന്വേഷണ സംഘത്തിന്റെ നേതൃത്വത്തിലുള്ള എ.ഡി.ജി.പിയുമായി അടുപ്പമുണ്ട്. കേസിന്റെ ചുമതലയുള്ള ദിനേന്ദ്ര കശ്യപിനെ ഒതുക്കിയാണ് അന്വേഷണം നടത്തിയതെന്നും ഹരജിയില്‍ വ്യക്തമാക്കുന്നു. ദിനേന്ദ്ര കശ്യപ് തന്നെ കണ്ടിട്ടുപോലുമില്ല. അടുത്ത ദിവസം റിലീസ് ചെയ്യാന്‍ ഉദ്ദേശിക്കുന്ന രാമലീല ഉള്‍പ്പെടെയുള്ള ചിത്രങ്ങള്‍ക്കായി അഡ്വാന്‍സ് വാങ്ങിയിട്ടുണ്ട്. ഇവയുടെ മൊത്തം ചെലവ് 50 കോടിയിലേറെ രൂപ വരും. ഇതുള്‍പ്പെടെയുള്ള പ്രൊജക്ടുകളെ ജയില്‍ ജീവിതം ബാധിക്കും.
അങ്കമാലി ജുഡിഷ്യല്‍ ഫസ്റ്റ് ക്ലാസ് മജിസ്‌ട്രേട്ട് കോടതിയില്‍ ദിലീപ് കഴിഞ്ഞ ദിവസം നല്‍കിയ ജാമ്യാപേക്ഷ തള്ളിയിരുന്നു. തുടര്‍ന്നാണ് വീണ്ടും ഹൈക്കോടതിയിലെത്തിയത്.