ചെറുതുരുത്തി: കേരളത്തിന്റെ ഫുട്‌ബോള്‍ സ്വപ്നങ്ങള്‍ക്ക് പുതിയ ചിറകുകള്‍ നല്‍കിയ കേരള ബ്ലാസ്‌റ്റേഴ്‌സ് ആരാധക കൂട്ടായ്മ സംസ്ഥാനത്തിന്റെ സംസ്‌കാര സമ്പന്നതയുടെ പ്രതീകമായ ഭാരതപുഴയുടെ സംരക്ഷണത്തിന് വിപുലമായ പദ്ധതിയുമായി രംഗത്ത് . വരും തലമുറയ്ക്ക് വേണ്ടി പുഴയെ സംരക്ഷിച്ച് നിര്‍ത്തേണ്ടതിന്റെ പ്രാധാന്യം വിളിച്ചോതിയും പുഴയുമായി ചുറ്റിപറ്റിയുള്ള ജീവന്റെയും ജീവിതത്തിന്റെയും നിലനില്‍പ്പിന് വേണ്ടിയുമുള്ള ബൃഹത്തായ ആശയമാണ് മഞ്ഞപ്പടയുടെ കൂട്ടുകാര്‍ മുന്നോട്ട് വെയ്ക്കുന്നത്. നാശത്തിലേയ്ക്കുള്ള ജീവജാലങ്ങളുടെ യാത്രയില്‍ അടുത്തത് മനുഷ്യനാണെന്ന് ഓര്‍മപ്പെടുത്തുന്നു ഇവര്‍. നിളയെ സംരക്ഷിയ്ക്കുമെന്ന് പ്രതിജ്ഞ ചെയ്ത് ഈ മാസം 24 ന് നിളയില്‍ റാലി ഫോര്‍ റിവേഴ്‌സ് കാംപയിന്‍ സംഘടിപ്പിക്കുമെന്ന് സംഘാടക സമിതി ഭാരവാഹികള്‍ അറിയിച്ചു. ചെറുതുരുത്തി ഭാരതപ്പുഴയോരത്താണ് പരിപാടി. യു.ആര്‍ പ്രദീപ് എം.എല്‍.എ ഉദ്ഘാടനം ചെയ്യും. പരിസ്ഥിതി പ്രവര്‍ത്തകന്‍ വിപിന്‍ കൂടിയേടത്ത് അധ്യക്ഷനാകും. രാഷ്ട്രീയ സാംസ്‌കാരിക പരിസ്ഥിതി മേഖലയിലെ നിരവധി പ്രവര്‍ത്തകര്‍ പങ്കെടുക്കും. കാംപയിന്റെ ഭാഗമായി നിള സംരക്ഷണ മുദ്രാവാക്യവുമായി നിളയിലൂടെ റാലി നടത്തും. പ്രതീകാത്മകമായി കളിക്കളങ്ങളും സജ്ജീകരിയ്ക്കുമെന്നും ഭാരവാഹികള്‍ അറിയിച്ചു.