കൊല്ലം: കേരളത്തില്‍ നിന്നുള്ള പുതിയ കേന്ദ്രമന്ത്രി അല്‍ഫോണ്‍സ് കണ്ണന്താനം പ്രതീക്ഷയേക്കാള്‍ കേരളത്തിന് വലിയ അപമാനമായി തീര്‍ന്നിരിക്കുകയാണെന്ന് നെഹ്‌റു ഫൗണ്ടേഷന്‍ ജില്ലാ കമ്മിറ്റി.
അര്‍ഹിക്കാതെ വീണ് കിട്ടിയ കേന്ദ്രമന്ത്രി പദവി മൂലം സമതല തെറ്റി അദ്ദേഹം പിച്ചും പേയും പറയുകയാണെന്ന്, പെട്രോളിയം ഉല്‍പ്പന്നങ്ങള്‍ വാങ്ങുന്നത് രാജ്യത്തെ സമ്പന്നമാരാണെന്ന് വിഢിത്തം പറഞ്ഞതിലൂടെ സാധാരണ ജനത്തിന്റെ ജീവിതവുമായി ഒരു ബന്ധവുമില്ലാത്തയാളാണ് താനെന്ന് തെളിയിച്ചിരിക്കുകയാണെന്ന് യോഗം ചൂണ്ടികാട്ടി.
അല്‍ഫോണ്‍സ് കണ്ണന്താനത്തെപ്പോലെയുള്ള അല്‍പ്പന്‍മാരെ മന്ത്രിസഭയില്‍ ഉള്‍പ്പെടുത്തി മന്ത്രിസഭ വികസനം നടത്തി മോദി തന്റെ ഏകാധിപത്യനയം രാജ്യത്ത് നടപ്പിലാക്കുകയാണെന്നും.
ഉമ്മന്‍ചാണ്ടി സര്‍ക്കാര്‍ ചെയ്തതുപോലെ പെട്രോളിയം വിലവര്‍ധനവിലൂടെ സംസ്ഥാനത്ത് ലഭിക്കുന്ന നാല്‍പത് ശതമാനം ലാഭ വിഹിതം വേണ്ടായെന്ന് വച്ച് ജനങ്ങള്‍ക്ക് പെട്രോളിന് വിലകുറച്ചു കൊടുക്കുവാനുള്ള നടപടി പിണറായി ഗവണ്‍മെന്റും സ്വീകരിക്കണമെന്നും യോഗം ഉദ്ഘാടനം ചെയ്ത സംസ്ഥാന പ്രസിഡന്റ് കെ.എസ്.പുരം സുധീര്‍ ആവശ്യപ്പെട്ടു.
വോട്ട് ചെയ്ത ജനത്തോട് കേന്ദ്രസംസ്ഥാന സര്‍ക്കാരുകള്‍ മത്സരിച്ച് ജനദ്രോഹ നടപടികള്‍ സ്വീകരിക്കുകയാണെന്ന് യോഗം കുറ്റപ്പെടുത്തി.
ബിനു അധ്യക്ഷനായി. സേതുമാധവന്‍, നവപുരം ശ്രീകുമാര്‍, രാജേഷ് സംസാരിച്ചു.