ന്യൂഡല്‍ഹി: മുതിര്‍ന്ന അഭിഭാഷകര്‍ക്ക് സുപ്രിം കോടതിയില്‍ കേസുകള്‍ നേരത്തെ കേള്‍ക്കാന്‍ ചീഫ്ജസ്റ്റിസ് മുമ്പാകെ പരാമര്‍ശം നടത്തുന്നതിന് (മെന്‍ഷന്‍ ചെയ്യല്‍) വിലക്ക്. സുപ്രിം കോടതിയില്‍ ഹരജികള്‍ ഫയല്‍ചെയ്യാന്‍ യോഗ്യതനേടിയ അഡ്വക്കേറ്റ് ഓണ്‍ റെക്കോര്‍ഡുമാര്‍ മാത്രമെ ഇനി മുതല്‍ കേസുകള്‍ മെന്‍ഷന്‍ചെയ്യാന്‍ പാടുള്ളൂവെന്നും ചീഫ് ജസ്റ്റിസ് ദീപക് മിശ്ര വ്യക്തമാക്കി. ഒരുകേസ് നേരത്തെ കേള്‍ക്കണമെന്നോ അല്ലെങ്കില്‍ കേസിന്റെ വാദംനടക്കുന്ന തിയതി നിശ്ചയിക്കണമെന്ന് ആവശ്യപ്പെടാനോ അഡ്വക്കേറ്റ് ഓണ്‍റെക്കോര്‍ഡുമാര്‍ക്കു മാത്രമെ അധികാരമുള്ളൂ.
ചീഫ് ജസ്റ്റിസ് അധ്യക്ഷനായ ഒന്നാം നമ്പര്‍ കോടതിയിലാണ് അടിയന്തരമായി പരിഗണിക്കണ്ട കേസ് പരാമര്‍ശിക്കല്‍ നടത്തുക. സാധാരണ കേസുകള്‍ സുപ്രിം കോടതി മുമ്പാകെ ജൂനിയര്‍ അഭിഭാഷകരാണ് പരാമര്‍ശിക്കാറുള്ളത്. വരിനിന്നാണ് ഇവര്‍ ഇങ്ങനെ ചെയ്യാറുള്ളത്. എന്നാല്‍, മുതിര്‍ന്ന അഭിഭാഷകര്‍ കേസുകള്‍ മെന്‍ഷന്‍ ചെയ്യാറില്ലെങ്കിലും പെട്ടെന്നു കേള്‍ക്കാനായി അവരുടെ പദവി ഉപയോഗിച്ച് വരിനില്‍ക്കാതെ നേരിട്ടു ചീഫ്ജസ്റ്റിസിനെ കണ്ട് കേസ് പരാമര്‍ശിക്കാറാണ് പതിവ്.
ജൂനിയര്‍ അഭിഭാഷകര്‍ വരിനില്‍ക്കുന്നതിനിടെ മുതിര്‍ന്ന അഭിഭാഷകര്‍ വരുന്നതിനാല്‍ അവര്‍ക്ക് മുന്‍ഗണന ലഭിക്കുകയും മറ്റുള്ളവര്‍ക്ക് അവസരം നഷ്ടപ്പെടുകയും ചെയ്യും.