മക്ക: കനത്ത വെയിലില്‍ നിന്നു രക്ഷനേടാന്‍ തീര്‍ത്ഥാടകര്‍ കുട കൂടിയപ്പോള്‍ കഅ്ബക്കു ചുറ്റും വര്‍ണ്ണം നിറഞ്ഞ വൈവിധ്യത്തിന്റെ ക്ലിക്കിനു നാഷണല്‍ ജിയോഗ്രഫി വെബ്‌സൈറ്റ് അവാര്‍ഡ്. ഹജ്ജ് കര്‍മ്മത്തിനു ശേഷം ദുല്‍ഹിജ്ജ 10 നു മക്കയിലെത്തിയ ഹാജിമാര്‍ വര്‍ണ്ണക്കുടകളില്‍ തീര്‍ത്ത വിസ്മയം പകര്‍ത്തിയത് അമ്മാര്‍ അമീര്‍ എന്ന ഫോട്ടോ ഗ്രാഫറാണ്.

വര്‍ണ്ണ വൈവിധ്യത്താല്‍ തീര്‍ത്ഥാടകര്‍ കഅ്ബ പ്രദക്ഷിണം വെക്കുന്ന വീഡിയോ നിമിഷങ്ങള്‍ക്കകം സോഷ്യല്‍ മീഡിയയില്‍ വൈറലായിരുന്നു. ലോകത്തിന്റെ വിവിധ ഭാഗങ്ങളില്‍ നിന്നുള്ള ആയിരക്കണക്കിന് ഫോട്ടോകളില്‍ നിന്നാണ് ഈ പടം തിരഞ്ഞെടുക്കപ്പെട്ടത്.

ഏറ്റവും കൂടുതല്‍ വോട്ട് ലഭിക്കുകയും ഫോട്ടോഗ്രാഫി വിദഗ്ദ്ധരായ പ്രശസ്ത എഡിറ്റര്‍മാരുടെ പ്രശംസ നേടുകയും ചെയ്തു. ഫോട്ടോ മക്ക ഗവര്‍ണറും കേന്ദ്ര ഹജ്ജ് കമ്മിറ്റി അധ്യക്ഷനുമായ അമീര്‍ ഖാലിദ് അല്‍ ഫൈസല്‍ രാജകുമാരന് ഉപഹാരമായി നല്‍കിയിട്ടുണ്ട്.