ദോഹ: ചര്‍ച്ചകളിലൂടെ മാത്രമെ ഗള്‍ഫ് പ്രതിസന്ധി പരിഹരിക്കാനാവുകയുള്ളുവെന്ന് ഖത്തര്‍ വിദേശകാര്യമന്ത്രി ശൈഖ് മുഹമ്മദ് ബിന്‍ അബ്ദുല്‍റഹ്മാന്‍ അല്‍താനി.

യുഎന്‍ പൊതുസഭയുടെ 72ാമത് സെഷനോടനുബന്ധിച്ച് ന്യുയോര്‍ക്കില്‍ വിവിധ രാജ്യങ്ങളുടെ മന്ത്രിമാരുമായും ഉന്നത നയതന്ത്രപ്രതിനിധികളുമായും നടത്തിയ ചര്‍ച്ചകളിലാണ് വിദേശകാര്യമന്ത്രി ഖത്തര്‍ നിലപാട് വ്യക്തമാക്കിയത്.

സഊദി സഖ്യരാജ്യങ്ങളുടെ നിയമവിരുദ്ധ ഉപരോധത്തെക്കുറിച്ചും അതിനെത്തുടര്‍ന്നുണ്ടായ മനുഷ്യാവകാശ ലംഘനങ്ങള്‍ ഉള്‍പ്പടെയുള്ള പ്രത്യാഘാതങ്ങളെക്കുറിച്ചും വിദേശകാര്യമന്ത്രി ലോകനേതാക്കളോട് വിശദീകരിച്ചു. സൊമാലിയ പ്രധാനമന്ത്രി ഹസന്‍ അലി ഖായിര്‍, വിദേശകാര്യങ്ങള്‍ക്കും സുരക്ഷാനയങ്ങള്‍ക്കുമായുള്ള യൂറോപ്യന്‍ യൂണിയന്‍ പ്രതിനിധി ഫെഡറിക് മോഘെറിനി, ഇറ്റലി വിദേശകാര്യ, രാജ്യാന്തര സഹകരണ മന്ത്രി ആഞ്ചലിനോ അല്‍ഫാനോ, ഉക്രെയ്ന്‍ വിദേശകാര്യമന്ത്രി പാവ്‌ലോ ക്ലിംകിന്‍, ഓസ്‌ട്രേലിയ വിദേശകാര്യമന്ത്രി ജൂലി ബിഷപ് എന്നിവരുമായി കൂടിക്കാഴ്ച നടത്തി.

രാജ്യാന്തര ക്രൈസിസ് ഗ്രൂപ്പ് പ്രസിഡന്റ് ജീന്‍ മാരി ഗെഹ്നോയുമായും ചര്‍ച്ച നടത്തി. മിഡില്‍ഈസ്റ്റിലെ പുതിയ സംഭവവികാസങ്ങള്‍, സിറിയ, ലിബിയ, യെമന്‍ എന്നിവിടങ്ങളിലെ പ്രശ്‌നങ്ങള്‍ വിദേശകാര്യമന്ത്രി ചര്‍ച്ച ചെയ്തു.

ഈ രാജ്യങ്ങളുമായും ഏജന്‍സികളുമായി ഖത്തറിനുള്ള ഉഭയകക്ഷി ബന്ധം, വിവിധ മേഖലകളില്‍ സഹകരണം ശക്തിപ്പെടുത്തല്‍ എന്നിവയും ചര്‍ച്ചയായി. ഗള്‍ഫ് പ്രതിസന്ധിയുമായി ബന്ധപ്പെട്ട ഏറ്റവും പുതിയ സംഭവവികാസങ്ങള്‍ വിദേശകാര്യമന്ത്രി ഇവരോട് വിശദീകരിച്ചു.