തിരുവനന്തപുരം: കശുവണ്ടി വ്യവസായവുമായി ബന്ധപ്പെട്ട കാര്യങ്ങളില്‍ ക്രിയാത്മകമായി ഇടപെടുന്നതിന് കേരള കാഷ്യു ബോര്‍ഡ് ലിമിറ്റഡ് എന്ന പേരില്‍ കമ്പനി രൂപീകരിക്കും. കമ്പനി രജിസ്റ്റര്‍ ചെയ്യാനുള്ള നിര്‍ദേശം ബുധനാഴ്ച ചേര്‍ന്ന മന്ത്രിസഭായോഗം അംഗീകരിച്ചു.
കമ്പനിയില്‍ 49 ശതമാനം ഓഹരി സര്‍ക്കാരിനും ബാക്കി 51 ശതമാനം ഓഹരി സര്‍ക്കാര്‍ നിശ്ചയിക്കുന്ന അനുപാതത്തില്‍ കശുവണ്ടി വികസന കോര്‍പറേഷന്‍, കാപ്പക്‌സ്, മറ്റു സ്ഥാപനങ്ങള്‍, വ്യക്തികള്‍ എന്നിവര്‍ക്ക് നല്‍കും.
വിദേശത്തുനിന്നും സ്വദേശത്തു നിന്നും ഉല്‍പാദകരില്‍നിന്ന് നേരിട്ട് കശുവണ്ടി സംഭരിക്കുക, സ്വകാര്യ മേഖലയിലടക്കമുളള ഫാക്ടറികള്‍ക്ക് തോട്ടണ്ടി വിതരണം ചെയ്യുക, ആവശ്യമെങ്കില്‍ കശുവണ്ടിപ്പരിപ്പ് വിപണനത്തില്‍ ഏര്‍പെടുക, കശുവണ്ടിയുടെ ആഭ്യന്തര ഉല്‍പാദനം വര്‍ധിപ്പിക്കാന്‍ നടപടികള്‍ സ്വീകരിക്കുക എന്നിവയാണ് കമ്പനി രൂപീകരണത്തിന്റെ ലക്ഷ്യങ്ങള്‍.