ക്വിറ്റോ: 2018 ലോകകപ്പില്‍ അര്‍ജന്റീന ഉണ്ടാകുമോ എന്നു തീരുമാനിക്കുന്ന അതിനിര്‍ണായക മത്സരത്തില്‍ തകര്‍പ്പന്‍ ജയത്തോടെ അര്‍ജന്റീന റഷ്യയിലേക്ക്. ക്യാപ്റ്റന്‍ മെസ്സിയുടെ തകര്‍പ്പന്‍ പ്രകടനത്തില്‍ ഹാട്രിക് ഗോളുകളോടെയാണ് അര്‍ജന്റൈന്‍ കടുവകള്‍ ഇക്വഡോറിനെ മലര്‍ത്തിയടിച്ചത്.

എല്ലാം കൈവിട്ടു പോയിടത്തു നിന്ന് ഫീനിക്‌സ് പക്ഷിയെപ്പോലെ ഉയിര്‍ത്തെഴുന്നേല്‍ക്കുകയായിരുന്നു അക്ഷരാര്‍ത്ഥത്തില്‍ ടീം അര്‍ജന്റീന. ഒന്നിനെതിരെ മൂന്നു ഗോളുകള്‍ നേടിയാണ് ടീം ലോകകപ്പ് പ്രവേശന സാധ്യത നിലനിര്‍ത്തിയത്.

ആദ്യ പകുതിയില്‍ തന്നെ രണ്ടു ഗോളുകളുമായി മെസ്സി ഇക്വഡോറിനെ ഞെട്ടിച്ചു.മത്സരത്തിന്റെ വിസില്‍ മുഴങ്ങിയതും ലോകമെമ്പാടുമുള്ള അര്‍ജന്റീനന്‍ ആരാധകരെ ഞെട്ടിച്ച് ഇക്വഡോര്‍ ആദ്യ ഗോള്‍ നേടി. ഇതോടെ അടിമുടി സമ്മര്‍ദത്തിലായ മെസ്സിയും കൂട്ടരും കളി തുടങ്ങുകയായിരുന്നു.

11ാം മിനിറ്റില്‍ തന്നെ മെസ്സിയുടെ മനോഹരമായ മധുരപ്രതികാരം. പിന്നാലം 18ാം മിനിറ്റില്‍ വീണ്ടും മെസ്സിയുടെ മാന്ത്രിക ഗോള്‍. 62ാം മിനിറ്റ് വരെ കാത്തിരിക്കേണ്ടി വന്നു മെസ്സിയുടെ മൂന്നാമത്തെ ഗോളിന്. വിമര്‍ശകരുടെ വായടപ്പിച്ചും ആരാധകരുടെ പിന്തുണക്കും പ്രാര്‍ത്ഥനകള്‍ക്കുമുള്ള മറുപടിയുമായിരുന്നു മെസ്സിയുടെ ഹാട്രിക് ഗോളുകള്‍.