ഹൈദരാബാദ്: കുഞ്ഞുങ്ങള്‍ക്കെതിരായ ലൈംഗികാതിക്രമങ്ങള്‍ രാജ്യത്ത് തുടര്‍ക്കഥയാവുന്നു. തെലങ്കാനയ്ക്ക് സമീപം ആറ് വയസ്സുകാരിയെ ബലാത്സംഗം ചെയ്ത് കൊന്ന് കിണറ്റില്‍ ഉപേക്ഷിച്ച നിലയില്‍ കണ്ടെത്തി. കുട്ടിയുടെ അമ്മാവനാണ് പ്രതി. ഇയാളെ പൊലിസ് അറസ്റ്റു ചെയ്തു.

 തെലങ്കാന മൊഗ്ഡംപള്ളിയിലെ മന്നാപ്പൂര്‍ ഗ്രാമത്തിലാണ് നാടിനെ നടുക്കിയ സംഭവമുണ്ടായത്. ഉച്ചയ്ക്ക് വീട്ടില്‍ വന്ന് ഭക്ഷണം കഴിച്ച് സ്‌കൂളിലേക്ക് മടങ്ങുന്നതിനിടെ കുട്ടിയെ ഇയാള്‍ കൊണ്ടു പോവുകയായിരുന്നു. ബുധനാഴ്ച ഉച്ചയ്ക്ക് ഭക്ഷണം കഴിക്കാനായി പെണ്‍കുട്ടി സ്‌കൂളില്‍ നിന്നും  വീട്ടിലെത്തിയിരുന്നു. പിന്നീട് വൈകീട്ട് സ്‌കൂള്‍ സമയം കഴിഞ്ഞ് ഏറെ വൈകിയിട്ടും കുട്ടിയെ കാണാത്തത്തിനെ തുടര്‍ന്ന് വീട്ടുകാര്‍ പൊലിസില്‍ വിവരമറിയിക്കുകയായിരുന്നു.

പെണ്‍കുട്ടിയെ ഉച്ചയ്ക്ക് ശേഷം അമ്മയുടെ സഹോദരനൊപ്പം കണ്ടിരുന്നുവെന്ന് പ്രദേശവാസികള്‍ ല്‍കിയ മൊഴിയാണ് പ്രതിയെ പിടികൂടാന്‍ സഹായകമായത്. മൊഴിയുടെ അടിസ്ഥാനത്തില്‍ 22കാരനായ ശിവകുമാര്‍ എന്ന യുവാവിനെ പൊലിസ് അറസ്റ്റ് ചെയ്തു.

സ്‌കൂളിലേക്കുള്ള യാത്രയ്ക്കിടെ പെണ്‍കുട്ടിയെ സമീപത്തെ കൃഷിയിടത്തിലേക്ക് കൂട്ടിക്കൊണ്ടു പോയി നിരവധി തവണ പീഡിപ്പിച്ചുവെന്നും, ശേഷം സമീപത്തെ കിണറിലേക്ക് വലിച്ചെറിഞ്ഞെന്നും ഇയാള്‍ പൊലിസില്‍ കുറ്റസമ്മതം നടത്തുകയായിരുന്നു.  കുട്ടിയുടെ മൃതദേഹം കിണറില്‍ നിന്നും കണ്ടെടുത്തിട്ടുണ്ട്.