അത്തോളി: യു.ഡി.എഫ് ആഹ്വാനം ചെയ്ത ഹര്‍ത്താലില്‍ അത്തോളിയില്‍ നേരിയ സഘര്‍ഷം. കുനിയില്‍ കടവ് ജംഗ്ഷനില്‍ വച്ച് യു.ഡി.എഫ് പ്രവര്‍ത്തകര്‍ ഡി.വൈ.എഫ്.ഐ പ്രവര്‍ത്തകന്റെ വാഹനം തടഞ്ഞത് ചോദ്യം ചെയ്യാനെത്തിയ സി.പി.എം പ്രവര്‍ത്തകരും യു.ഡി.എഫ് പ്രവര്‍ത്തകരും തമ്മിലാണ് സംഘര്‍ഷമുണ്ടായത്.

അതെ സമയം ഹര്‍ത്താലില്‍ വാഹനം തടഞ്ഞു വച്ച് യാത്രക്കാരനെ മര്‍ദ്ദിച്ചു എന്ന പരാതിയില്‍ കോണ്‍ഗ്രസ് നേതാക്കള്‍ക്കെതിരെ വധശ്രമത്തിന് കേസെടുത്തു. കെ. എസ് യു സംസ്ഥാന പ്രസിഡന്റ് കെ.എം. അഭിജിത്, യൂത്ത് കോണ്‍ഗ്രസ് പാര്‍ലമെന്റ് കമ്മറ്റി പ്രസിഡന്റ് ജൈസല്‍ അത്തോളി, മണ്ഡലം കോണ്‍ഗ്രസ് പ്രസിഡന്റ് ഗിരീഷ് മൊടക്കല്ലൂര്‍ എന്നിവരടക്കം കണ്ടാലറിയാവുന്ന 30ഓളം യു ഡി എഫുകാര്‍ക്കെതിരെ പൊലീസ് കേസെടുത്തു.

അത്തോളിയില്‍ യുഡിഎഫുകാരും സി പി എമ്മുകാരും സംഘടിച്ചിരുന്നു. എസ് ഐ രവീന്ദ്രന്‍ കൊമ്പിലാടിന്റെ നേതൃത്വത്തിലുള്ള പോലീസിന്റെ ഇടപെടല്‍ മൂലമാണ് സംഘര്‍ഷം ഒഴിവായത്. സംഭവത്തില്‍ വൈകീട്ട് സി.പി.എം ന്റെ നേതൃത്വത്തില്‍ പ്രതിഷേധം പ്രകടനം നടത്തി.