തൊടുപുഴ: സംസ്ഥാനത്തെ പ്രാഥമിക സഹകരണ സംഘങ്ങളിലെ വിവിധ തസ്തികകളില്‍ നിയമനം നടത്തുന്നതിന് രൂപീകരിച്ച സഹകരണ പരീക്ഷാ ബോര്‍ഡ് നോക്കുകുത്തി.
ക്ലര്‍ക്ക് മുതല്‍ മുകളിലേക്കുള്ള തസ്തികകളില്‍ ബോര്‍ഡ് മുഖേന മാത്രമേ നിയമനം നടത്താവൂവെന്ന സര്‍ക്കാര്‍ ഉത്തരവ് അട്ടിമറിച്ച് സഹകരണ സംഘങ്ങളില്‍ പിന്‍വാതില്‍ നിയമനം തകൃതിയായി നടക്കുകയാണ്.
സഹകരണ ചട്ടം പരിഷ്‌കരിക്കുന്നതിലൂടെ ഇഷ്ടക്കാരെ തിരുകിക്കയറ്റാന്‍ ഭരണസമിതികള്‍ക്ക് കൂടുതല്‍ അവസരം ഒരുങ്ങുകയാണ്. ചട്ടം പരിഷ്‌കരണം സംബന്ധിച്ച കരട് നിര്‍ദേശങ്ങള്‍ സര്‍ക്കാര്‍ പുറപ്പെടുവിച്ചുകഴിഞ്ഞു.
നിയമനങ്ങളിലെ അഴിമതി ഒഴിവാക്കുകയെന്ന ലക്ഷ്യത്തോടെയാണ് സംസ്ഥാന സര്‍ക്കാര്‍ സഹകരണ പരീക്ഷാ ബോര്‍ഡ് രൂപീകരിച്ചത്. 2017 ജനുവരി 13ന് ആര്‍.വി സതീന്ദ്രകുമാറിനെ ചെയര്‍മാനാക്കി എല്‍.ഡി.എഫ് സര്‍ക്കാര്‍ പരീക്ഷാ ബോര്‍ഡ് പുനഃസംഘടിപ്പിച്ചു. സഹകരണ ഡെപ്യൂട്ടി രജിസ്ട്രാറാണ് ബോര്‍ഡിന്റെ സെക്രട്ടറി.
സംസ്ഥാനത്തെ 11,908 സഹകരണ സംഘങ്ങള്‍, 3631 വായ്പാ സംഘങ്ങള്‍, 60 അര്‍ബന്‍ ബാങ്കുകള്‍ എന്നിവിടങ്ങളിലെ ജൂനിയര്‍ ക്ലര്‍ക്ക് മുതല്‍ മുകളിലേക്കുള്ള തസ്തികകളിലേക്ക് നിയമനം നടത്താന്‍ ചുമതലയുള്ള പരീക്ഷാ ബോര്‍ഡിന്റെ പ്രവര്‍ത്തനമാണ് ഇപ്പോള്‍ വഴിപാടായിരിക്കുന്നത്.
5077 ഒഴിവുകള്‍ പരീക്ഷാ ബോര്‍ഡിന് റിപ്പോര്‍ട്ട് ചെയ്തിട്ടും ഈ സര്‍ക്കാര്‍ അധികാരത്തിലെത്തിയശേഷം 500ഓളം നിയമനങ്ങള്‍ക്കുള്ള പരീക്ഷ മാത്രമാണ് നടന്നിരിക്കുന്നത്. സെക്രട്ടറി പോസ്റ്റിലേക്കുള്ള പരീക്ഷ ഇന്നലെയാണ് നടന്നത്. ഇതോടെ അര്‍ഹതപ്പെട്ട ഉദ്യോഗാര്‍ഥികള്‍ക്ക് അവസരം നഷ്ടമാകുന്നതിന് പുറമെ പിന്‍വാതില്‍ നിയമനങ്ങളും ചട്ടവിരുദ്ധ പ്രമോഷനുകളും തകൃതിയായി നടക്കുന്നു.
സഹകരണ ബോര്‍ഡ് നടത്തുന്ന പരീക്ഷകള്‍ പലപ്പോഴും വഴിപാടാകുകയാണ്. എഴുത്തുപരീക്ഷയും മൂല്യനിര്‍ണയവും നടത്തുകയാണ് പരീക്ഷാ ബോര്‍ഡിന്റെ ചുമതല. പരമാവധി 80 മാര്‍ക്കാണ് എഴുത്തുപരീക്ഷക്ക് ലഭിക്കുക. 20 മാര്‍ക്ക് സംഘം ഭരണസമിതി നടത്തുന്ന ഇന്റര്‍വ്യൂവിന് നല്‍കും.
ഇതില്‍ ജ ില്ലാ വെയ്‌റ്റേജായി അഞ്ച് മാര്‍ക്കും അഭിമുഖത്തിന് ഹാജരാകുന്നവര്‍ക്ക് 3 മാര്‍ക്കും നല്‍കണം. 12 മാര്‍ക്ക് ഭരണസമിതികളുടെ താല്‍പര്യംപോലെ നല്‍കാം. ഈ നിബന്ധനയാണ് നിയമനങ്ങളെ അഴിമതിയുടെ കൂത്തരങ്ങാക്കുന്നത്. ഇവിടെ ചോദ്യപേപ്പര്‍ ചോര്‍ച്ച ഏതാണ്ട് നിത്യസംഭവമാണ്. ഇത് പലപ്പോഴും പുറത്തറിയുന്നില്ലെന്ന് മാത്രം. ഒരു വേക്കന്‍സിക്ക് 10 പേരുടെ റാങ്ക് ലിസ്റ്റാണ് പരീക്ഷാ ബോര്‍ഡ് സംഘങ്ങള്‍ക്ക് നല്‍കുക. ഇവരില്‍ നിന്ന് ഭരണസമിതി അഭിമുഖം നടത്തിയാണ് അന്തിമ റാങ്ക് ലിസ്റ്റ് പ്രസിദ്ധീകരിക്കേണ്ടത്.
തട്ടിപ്പുകള്‍ സംബന്ധിച്ച് വ്യക്തമായ ബോധ്യമുണ്ടെങ്കിലും സഹകരണ സംഘം ഭരണസമിതികളുടെ രാഷ്ട്രീയ സ്വാധീനം പലപ്പോഴും സഹകരണ വകുപ്പ് ഉദ്യോഗസ്ഥര്‍ക്ക് കൂച്ചുവിലങ്ങാകുകയാണ്. ഈ മേഖലയിലെ അഴിമതികളെ സംബന്ധിച്ച് പി. ഉബൈദുല്ല എം.എല്‍.എ നിയമസഭയില്‍ ആക്ഷേപം ഉന്നയിച്ചിരുന്നു.