കോഴിക്കോട്: രാത്രി ലേഡീസ് ഹോസ്റ്റലിനു സമീപം കറങ്ങുന്നത് ചോദ്യം ചെയ്ത 16കാരന് പൊലിസിന്റെ ക്രൂര മര്‍ദനം.കോഴിക്കോട് നടക്കാവിലാണ് സംഭവം. കഴുത്തിലെ എല്ലിനും ഇടുപ്പെല്ലിനും സാരമായി പരുക്കേറ്റ അജയ് (16) കോഴിക്കോട് ബീച്ച് ആശുപത്രിയില്‍ ചികിത്സയിലാണ്. മെഡിക്കല്‍ കോളജ് എസ്.ഐ ഹബീബുള്ളയാണ് തന്നെ മര്‍ദിച്ചതെന്ന് അജയ് പറഞ്ഞു.

കഴിഞ്ഞ ദിവസം രാത്രി നടക്കാവ് പൊലിസ് സ്റ്റേഷന്‍ പരിധിയിലെ എരഞ്ഞിപ്പാലം വനിതാ ഹോസ്റ്റലിനു മുന്നില്‍ എസ്.ഐ കറങ്ങുന്നത് കണ്ട അജയ്‌യുടെ പിതാവ് പുരുഷോത്തമന്‍ അദ്ദേഹത്തെ ചോദ്യം ചെയ്തു. ഇതോടെ എസ്.ഐ പുരുഷോത്തമനെ മര്‍ദ്ദിച്ചു. ഇത് കണ്ട് തടയാനെത്തിയ അജയിനെയും തുടര്‍ന്ന് പൊലിസ് ക്രൂരമായി മര്‍ദിക്കുകയായിരുന്നു.

ചൈല്‍ഡ് ലൈന്‍ അധികൃതര്‍ കുട്ടിയുടെ മൊഴിയെടുത്തു. ബാലാവകാശ കമ്മീഷന് പരാതി നല്‍കുമെന്ന് രക്ഷിതാക്കള്‍ പറഞ്ഞു.

അതേസമയം, ഹോസ്റ്റലില്‍ താമസിക്കുന്ന പ്രതിശ്രുത വധുവിനെ കാണാന്‍ എത്തിയതാണെന്നും, കുട്ടി ചോദ്യം ചെയ്തപ്പോള്‍ എതിര്‍ക്കുക മാത്രമാണ് ചെയ്തതെന്നുമാണ് എസ്.ഐയുടെ വിശദീകരണം. പൊലിസിനെതിരേ പരാതി നല്‍കിയെങ്കിലും സ്വീകരിക്കാന്‍ തയാറായില്ല.