തവാങ്: അരുണാചല്‍ പ്രദേശില്‍ വ്യോമസേനാ ഹെലികോപ്റ്റര്‍ തകര്‍ന്ന് ഏഴുപേര്‍ മരിക്കാനിടയായ സംഭവത്തിന്റെ വീഡിയോ ദൃശ്യങ്ങള്‍ പുറത്ത്. 19 സെക്കന്റ് വീഡിയോയില്‍ ഹെലികോപ്റ്ററിന്റെ വാല്‍ഭാഗം തകരുന്നത് വ്യക്തമായി കാണാം.

വ്യോമസേനയുടെ റഷ്യന്‍നിര്‍മിത എം.ഐ 17 വി 5 ഹെലികോപ്റ്ററാണ് തകര്‍ന്നുവീണത്. തവാങിന് സമീപം യങ്‌സ്റ്റെയിലെ സൈനിക ക്യാംപില്‍ അവശ്യസാധനങ്ങള്‍ എത്തിക്കാനുള്ള ദൗത്യത്തിനിടെയാണ് അപകടമുണ്ടായത്.

മണ്ണെണ്ണ കാനുകള്‍ പാരച്യൂട്ടിന്റെ സഹായത്തോടെ താഴേക്ക് ഇറക്കാന്‍ ശ്രമിക്കുന്നതിനിടെ ഹെലികോപ്റ്ററിന്റെ വാലില്‍ കുരുങ്ങി. പിന്നാലെ വാല്‍ഭാഗം കോപ്റ്ററില്‍ നിന്ന് വേര്‍പെടുകയായിരുന്നു. ഹെലികോപ്റ്ററുകള്‍ക്ക് വാലില്ലാതെ പറക്കാന്‍ കഴിയില്ല. സെക്കന്റുകള്‍ക്കുള്ളില്‍ ഹെലിക്കോപ്റ്ററിന് നിയന്ത്രണം നഷ്ടപ്പെട്ട് താഴേക്കു പതിക്കുകയായിരുന്നു.

രണ്ടു പൈലറ്റുമാര്‍ ഉള്‍പ്പെടെ അഞ്ച് വ്യോമസേന ഉദ്യോഗസ്ഥരും രണ്ടു സൈനികരുമാണ് അപകടത്തില്‍ മരണപ്പെട്ടത്. തവാങില്‍ നിന്ന് 130 കി.മീ അകലെയുള്ള യാങ്ചിയിലാണ് വ്യോമസേന ഉദ്യോഗസ്ഥരുടെ മൃതദേഹം കണ്ടെത്തിയത്. വ്യോമസേനയിലെ മുതിര്‍ന്ന പൈലറ്റുമാരാണ് ഹെലികോപ്റ്റര്‍ പറത്തിയിരുന്നത്.