കാസര്‍കോട്: എസ്.എം.എഫ് സംസ്ഥാന കമ്മിറ്റിയുടെ ആഭിമുഖ്യത്തില്‍ 2018 ഏപ്രിലില്‍ തൃക്കരിപ്പൂരിലെ കൈതക്കാട്‌വച്ച് നടക്കുന്ന മഹല്ല് പ്രവര്‍ത്തന പദ്ധതികളുടെ ദൃശ്യാവിഷ്‌കാരം ലൈറ്റ് ഓഫ് മദീനയുടെ സ്വാഗത സംഘം ഓഫിസ് ഉദ്ഘാടനം ജില്ലാ പ്രസിഡന്റ് ചെര്‍ക്കളം അബ്ദുല്ല നിര്‍വഹിച്ചു.
ലൈറ്റ് ഓഫ് മദീനയുടെ ലോഗോ പ്രകാശനം സ്വാഗത സംഘം കമ്മിറ്റി ട്രഷറര്‍ മെട്രോ മുഹമ്മദ് ഹാജി നിര്‍വഹിച്ചു. ജില്ലാ വൈസ് പ്രസിഡന്റ് ടി.കെ പൂക്കോയ തങ്ങള്‍ ചന്തേര അധ്യക്ഷനായി. എസ്.വൈ.എസ് സംസ്ഥാന ട്രഷററായി തെരഞ്ഞെടുക്കപ്പെട്ട മെട്രോ മുഹമ്മദ് ഹാജിയെ ടി.കെ പൂക്കോയ തങ്ങള്‍ ആദരിച്ചു.
സംസ്ഥാന തലത്തില്‍ മികച്ച മദ്‌റസയ്ക്കുള്ള അവാര്‍ഡ് നേടിയ ചന്തേര ഹയാത്തുല്‍ ഇസ്‌ലാം മദ്‌റസക്ക് ഉപഹാരം ജില്ലാ പ്രസിഡന്റ് വിതരണം ചെയ്തു.
എ. ഹമീദ് ഹാജി, ശംസുദ്ദീന്‍ ഹാജി പടന്ന, എം.സി ഇബ്‌റാഹിം ഹാജി, കൂളിക്കാടന്‍ കുഞ്ഞബ്ദുല്ല ഹാജി, ബി.എസ് ഇബ്‌റാഹിം, എ. അഹ്മദ് മൗലവി, സയ്യിദ് ശഫീഖ് തങ്ങള്‍, നാസര്‍ മാസ്റ്റര്‍ കല്ലൂരാവി, ജാബിര്‍ ഹുദവി ചാനടുക്കം, റഫീഖ് മാസ്റ്റര്‍ സംസാരിച്ചു.സ്വാഗത സംഘം കമ്മിറ്റി വര്‍ക്കിങ് കണ്‍വീനര്‍ സി.ടി അബ്ദുല്‍ ഖാദര്‍ സ്വാഗതം പറഞ്ഞു.
നവംബര്‍ 10ന് മുന്‍പ് ലൈറ്റ് ഓഫ് മദീനയുടെ മണ്ഡലംതല പ്രചാരണ കണ്‍വന്‍ഷനുകളും നവംബര്‍ 30 ന് മുന്‍പ് പഞ്ചായത്ത് തല കണ്‍വന്‍ഷനുകളും നടത്താന്‍ സ്വാഗത സംഘം കമ്മിറ്റി യോഗം തീരുമാനിച്ചു.
റബീഉല്‍ അവ്വലിലെ നബിദിനത്തോടനുബന്ധിച്ച് മഹല്ല് തലത്തില്‍ ലൈറ്റ് ഓഫ് മദീനയുടെ സന്ദേശ പാംലെറ്റ് വിതരണം ചെയ്യാനും തീരുമാനിച്ചു.