തൃശൂര്‍: നെല്ലിക്കുന്നില്‍ ഗ്യാസ് കട്ടര്‍ ഉപയോഗിച്ച് എ.ടി.എം കൊള്ളയടിക്കാന്‍ ശ്രമിക്കുന്നതിനിടെ തീപിടിത്തം. സൗത്ത് ഇന്ത്യന്‍ ബാങ്കിന്റെ എ.ടി.എം കൊള്ളയടിക്കാന്‍ ശ്രമിക്കുന്നതിനിടെയാണ് തീപിടിച്ചത്.
തുടര്‍ന്ന് മോഷ്ടാക്കള്‍ ശ്രമം ഉപേക്ഷിച്ച് മുങ്ങുകയായിരുന്നു. ഇന്നലെ പുലര്‍ച്ചെയാണ് സംഭവം. സെന്റ് സെബാസ്റ്റ്യന്‍ ദേവാലയത്തിന്റെ കീഴിലുള്ള ഷോപ്പിങ്ങ് സമുച്ചയത്തില്‍ പ്രവര്‍ത്തിക്കുന്ന എം.ടി.എം ശാഖയാണ് കൊള്ളയടിക്കാന്‍ ശ്രമിച്ചത്. വെളുപ്പിന് നാലിന് പള്ളിയിലെ സെക്യൂരിറ്റി ജീവനക്കാരന്‍ ഷോപ്പിങ്ങ് സമുച്ചയത്തിന് സമീപത്തെ ഗേറ്റ് തുറക്കാന്‍ എത്തിയപ്പോഴാണ് കൗണ്ടറില്‍ പുകയരുന്നത് ശ്രദ്ധയില്‍പെട്ടത്. പിന്നീട് കോംപ്ലക്‌സിലെ വൈദ്യുതി ബന്ധം വിച്ഛേദിക്കുകയും ഫയര്‍ഫോഴ്‌സില്‍ വിവരം അറിയിക്കുകയുമായിരുന്നു. ഫയര്‍ഫോഴ്‌സ് എത്തി തീയണയ്ക്കാന്‍ ശ്രമിക്കുന്നതിനിടെയാണ് എ.ടി.എം മെഷീന്‍ അറുത്ത് മാറ്റാന്‍ ശ്രമിച്ചത് ശ്രദ്ധയില്‍പ്പെട്ടത്.
എ.ടി.എം കൗണ്ടറിന് മുന്നില്‍ റോഡിലേക്ക് അഭിമുഖമായി സ്ഥാപിച്ച സി.സി.ടി.വി കാമറ ഇടത് വശത്തേക്ക് തിരിച്ച ശേഷമാണ് മോഷ്ടാക്കള്‍ അകത്ത് കടന്നത്. കഴിഞ്ഞ ചൊവ്വാഴ്ചയാണ് മെഷീനില്‍ അവസാനമായി പണം നിറച്ചത്. ബാങ്കിന്റെ നിര്‍ദേശപ്രകാരം ഏഴരലക്ഷത്തോളം രൂപ നിറച്ചിരുന്നതായി സ്വകാര്യ ഏജന്‍സിയിലെ ഉദ്യോഗസ്ഥര്‍ അറിയിച്ചു. 2,88,800 രൂപ മെഷീനിലെ കാഷ് കാസ്റ്റില്‍ ബാലന്‍സ് ഉള്ളതായി കണ്ടെത്തിയിട്ടുണ്ട്. ഉത്തേരന്ത്യന്‍ സംഘമാണ് മോഷണശ്രമത്തിന് പിന്നിലെന്ന സംശയത്തിലാണ് പൊലിസ്.