കൊടുങ്ങല്ലൂര്‍: പടിഞ്ഞാറെ വെമ്പല്ലൂര്‍ എം.ഇ.എസ് അസ്മാബി കോളജ് പ്രിന്‍സിപ്പാള്‍ ഡോ.അജിംസ് പി മുഹമ്മദിനെ ആക്രമിച്ച സംഭവവുമായി ബന്ധപ്പെട്ട് പൊലിസ് പ്രത്യേക അന്വേഷണ സംഘം രൂപീകരിച്ചു.
ഇരിങ്ങാലക്കുട ഡി.വൈ.എസ്.പി ഫേമസ് വര്‍ഗീസിന് കീഴില്‍ കൊടുങ്ങല്ലൂര്‍ സര്‍ക്കിള്‍ ഇന്‍സ്‌പെക്ടര്‍ പി.സി ബിജു കുമാര്‍, മതിലകം എസ്.ഐ മനു വി.നായര്‍, കൊടുങ്ങല്ലൂര്‍ എസ്.ഐ കെ.ജെ ജിനേഷ് എന്നിവരുടെ നേതൃത്വത്തിലാണ് അന്വേഷണ സംഘം പ്രവര്‍ത്തിക്കുക. പ്രാഥമികാന്വേഷണത്തിന്റെ ഭാഗമായി സംഭവസ്ഥലത്ത് പൊലിസ് തെളിവെടുപ്പ് നടത്തി.
കോളജ് പ്രിന്‍സിപ്പാളിന്റെ ക്വാര്‍ട്ടേഴ്‌സിന് സമീപമുള്ള സ്ഥാപനങ്ങളിലെ സി.സി.ടി.വി കാമറ ദൃശ്യങ്ങള്‍ വിശദമായി പരിശോധിക്കുമെന്ന് പൊലിസ് പറഞ്ഞു.
ഹെല്‍മറ്റ് ധരിച്ച് ബൈക്കിലെത്തിയ മൂന്നംഗ സംഘമാണ് ഡോ.അജിംസ് മുഹമ്മദിനെ വ്യാഴാഴ്ച്ച രാത്രി ആക്രമിച്ചത്.
ഇരുമ്പ് വടികൊണ്ടുള്ള ആക്രമണത്തില്‍ പ്രിന്‍സിപ്പാളിന്റെ കാലിന് പരുക്കേറ്റിട്ടുണ്ട്. കൊടുങ്ങല്ലൂരില്‍ ഷോപ്പിങ് കഴിഞ്ഞ് കുടുംബത്തോടൊപ്പം വീട്ടിലെത്തിയ പ്രിന്‍സിപ്പാള്‍ കാറില്‍ നിന്ന് ഇറങ്ങി വീട്ടിലേക്ക് കയറുന്നതിനിടെ പിന്നാലെ എത്തിയ രണ്ട് പേര്‍ ഇരുമ്പ് പൈപ്പ് കൊണ്ട് അടിക്കുകയായിരുന്നു.
തലയ്ക്കാണ് അടിക്കാന്‍ ശ്രമിച്ചതെങ്കിലും അദേഹം ഒഴിഞ്ഞുമാറിയതിനാല്‍ കാലിലാണ് അടിയേറ്റത്.
വൈകിട്ട് മുതല്‍ വീടിന്റെ പരിസരത്ത് ബൈക്കില്‍ കറങ്ങി നടന്നിരുന്ന മൂന്നംഗ സംഘമാണ് ആക്രമണത്തിന് പിന്നിലെന്ന് പൊലിസ് പറഞ്ഞു.