തൊടുപുഴ: ഇടവെട്ടി പഞ്ചായത്തിനെ തരിശ്‌രഹിതമാക്കുക എന്ന ലക്ഷ്യത്തോടെ പ്രവര്‍ത്തിക്കുന്ന ഇടവെട്ടി ഫാര്‍മേഴ്‌സ് ക്ലബ്ബിന്റെ ആസ്ഥാനമന്ദിരം 17ന് കര്‍ഷകദിനത്തില്‍ ഉദ്ഘാടനം ചെയ്യുമെന്ന് ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു.
നെടുങ്കല്ലേല്‍ എന്‍ പി അബ്രാഹം സംഭാവന നല്‍കിയ മൂന്ന് സെന്റ് സ്ഥലത്ത് 15 ലക്ഷം രൂപ മുടക്കിയാണ് മന്ദിരം നിര്‍മിച്ചിരിക്കുന്നത്. 100 പേര്‍ക്ക് ഇരിക്കാവുന്ന ഓഡിറ്റോറിയവും കെട്ടിടത്തില്‍ സജ്ജീകരിച്ചിട്ടുണ്ട്.
ഇടനിലക്കാരെ ഒഴിവാക്കി കര്‍ഷകരില്‍നിന്ന് നേരിട്ട് ഉല്‍പ്പന്നങ്ങള്‍ സംഭരിച്ച് ന്യായവില ഉറപ്പാക്കുന്ന ഓപ്പണ്‍ മാര്‍ക്കറ്റ് അടക്കമുള്ള സംവിധാനങ്ങള്‍ മന്ദിരത്തിലുണ്ട്.
ഗുണമേന്മയുള്ള ജൈവവിഭവങ്ങള്‍ ന്യായവിലയ്ക്ക് ഉപഭോക്താക്കള്‍ക്ക് ലഭ്യമാക്കാനും വീട്ടമ്മമാര്‍ക്ക് വരുമാനമാര്‍ഗമെന്ന നിലയില്‍ മൂല്യവര്‍ധിത ഉല്‍പ്പന്നങ്ങള്‍ ഉണ്ടാക്കി വില്‍പ്പന നടത്താനും ക്ലബ് അവസരമൊരുക്കും. ഇടവെട്ടി കനാല്‍ പാലത്തിനടുത്ത് 20 ലക്ഷം രൂപ മുടക്കി സമൃദ്ധി കര്‍ഷക ഓപ്പണ്‍ മാര്‍ക്കറ്റ് ആരംഭിക്കുന്നതിനുള്ള പ്രാരംഭനടപടികളും ക്ലബ് ആവിഷ്‌കരിച്ചിട്ടുണ്ട്.
പുതുതലമുറയെ കാര്‍ഷികസംസ്‌കൃതിയിലേക്ക് ആകര്‍ഷിക്കുന്നതിന് ഈ മേഖലയിലെ സാങ്കേതികവിദ്യകളെയും പ്രവണതകളെയും കുറിച്ചുള്ള ബോധവല്‍ക്കരണപരിപാടികള്‍ ക്ലബ് സംഘടിപ്പിക്കും.
മന്ദിരത്തില്‍ കാര്‍ഷിക ലൈബ്രറിയും വിനോദോപാധികളും ഒരുക്കിയിട്ടുണ്ട്. ഇടവെട്ടിയിലെ 57 പേര്‍ ചേര്‍ന്ന് ഒരു വര്‍ഷം മുമ്പാണ് ക്ലബ് രൂപീകരിച്ചത്. കെട്ടിടനിര്‍മാണത്തിന് അംഗങ്ങളുടെ സ്വന്തം ഫണ്ടും വായ്പയുമാണ് ഉപയോഗിച്ചത്.
പകല്‍ മൂന്നിന് ചേരുന്ന ചടങ്ങില്‍ പി.ജെ ജോസഫ് എംഎല്‍എ മന്ദിരം ഉദ്ഘാടനം ചെയ്യും. ഇടവെട്ടി പഞ്ചായത്ത് പ്രസിഡന്റ് ലത്തീഫ് മുഹമ്മദ് അധ്യക്ഷനാകും.
എന്‍.പി അബ്രാഹം നെടുങ്കല്ലേലിനെ തൊടുപുഴ ബ്ലോക്ക് പഞ്ചായത്ത് പ്രസിഡന്റ് ജിമ്മി പോള്‍ ആദരിക്കും. പ്രിന്‍സിപ്പല്‍ കൃഷി ഓഫീസര്‍ പി.ജി ഉഷാകുമാരി പദ്ധതി വിശദീകരണം നടത്തും.
ഇടവെട്ടി പഞ്ചായത്തംഗം ടി എം മുജീബ് കര്‍ഷകവിപണി ഉദ്ഘാടനം ചെയ്യും.
വാര്‍ത്താസമ്മേളനത്തില്‍ ക്ലബ് പ്രസിഡന്റ് സിറിയക് തോമസ്, സെക്രട്ടറി പി.എ വര്‍ക്കി, ട്രഷറര്‍ ടോമി സെബാസ്റ്റിയന്‍, തോമസ് മാത്യു കക്കുഴി, ടി.എം മുജീബ് എന്നിവര്‍ പങ്കെടുത്തു.