മ്യൂണിക്ക്: ജര്‍മന്‍ ബുണ്ടസ് ലീഗയില്‍ ബയേണ്‍ മ്യൂണിക്കിന് തകര്‍പ്പന്‍ ജയം. ഗ്ലാമര്‍ പോരില്‍ ഒന്നിനെതിരേ മൂന്നു ഗോളുകള്‍ക്ക് ബൊറൂസിയ ഡോര്‍ട്മുണ്ടിനെയാണ് അവര്‍ പരാജയപ്പെടുത്തിയത്. പുതിയ കോച്ച് ജൂപ് ഹെയ്ന്‍ക്കസിന്റെ കീഴില്‍ ക്ലബ് നേടുന്ന തുടര്‍ച്ചയായ നാലാം ജയമാണിത്. ഇതോടെ ഒന്നാം സ്ഥാനം നിലനിര്‍ത്തിയ ബയേണ്‍ 11 കളിയില്‍ നിന്ന് 26 പോയിന്റ് നേടി. അതേസമയം തോല്‍വിയോടെ ഡോര്‍ട്മുണ്ട് മൂന്നാം സ്ഥാനത്തേക്ക് വീണു. അവര്‍ക്ക് ഇത്രയും മത്സരത്തില്‍ നിന്ന് 20 പോയിന്റാണുള്ളത്.
16ാം മിനുട്ടില്‍ ആര്യന്‍ റോബനിലൂടെ ബയേണ്‍ അക്കൗണ്ട് തുറന്നു. ഈ ഗോളോടെ ബയേണിന് വേണ്ടി ഏറ്റവുമധികം ഗോള്‍ നേടുന്ന വിദേശ കളിക്കാരനെന്ന നേട്ടം റോബന്‍ സ്വന്തമാക്കി. താരത്തിന്റെ 93ാം ഗോളായിരുന്നു. 37ാം മിനുട്ടില്‍ റോബര്‍ട്ട് ലെവന്‍ഡോസ്‌കിയും 67ാം മിനുട്ടില്‍ അലാബയും ഗോള്‍ നേടി ടീമിന്റെ പട്ടിക പൂര്‍ത്തിയാക്കുകയായിരുന്നു.
മറ്റു മത്സരങ്ങളില്‍ ലെയ്പ്‌സിഗ് ഒന്നിനെതിരേ രണ്ടു ഗോളുകള്‍ക്ക് ഹന്നോവറിനെ പരാജയപ്പെടുത്തി രണ്ടാംസ്ഥാനത്തേക്ക് മുന്നേറി. ഐന്‍ത്രാഷ് ഫ്രാങ്ക്ഫര്‍ട്ട് ഇതേ സ്‌കോറിന് വെര്‍ഡര്‍ ബ്രെമനെയും ഹാംബര്‍ഗര്‍ ഒന്നിനെതിരേ മൂന്നു ഗോളുകള്‍ സ്റ്റുട്ഗര്‍ട്ടിനെയും ഷാല്‍ക്കെ എതിരില്ലാത്ത ഒരു ഗോളിന് ഫ്രെയ്ബര്‍ഗിനെയും പരാജയപ്പെടുത്തി.