തലശ്ശേരി: തലശ്ശേരി റെയില്‍വേ സ്റ്റേഷനില്‍ സര്‍വിസ് നടത്തിവരുന്ന ഓട്ടോകള്‍ രണ്ടാം ദിവസവും പണിമുടക്കി. പ്രീപെയ്ഡ് കൗണ്ടറിലെ നിരക്കില്‍ ക്രമക്കേടാരോപിച്ചാണ് ഡ്രൈവര്‍മാര്‍ പണിമുടക്കിയത്. ഇന്നലെ രാവിലെ റെയില്‍വേ സ്റ്റേഷനിലെത്തിയ ട്രാഫിക് എസ്.ഐ വി.വി ശ്രീജേഷ് പ്രീപെയ്ഡ് കൗണ്ടറിന് മുമ്പില്‍ ഉയര്‍ത്തിയ നിരക്ക് അനുസരിച്ചു തന്നെ സര്‍വിസ് നടത്തണമെന്നാവശ്യപ്പെട്ടിരുന്നു. ഇതോടെ ഓട്ടോ ഡ്രൈവര്‍മാര്‍ ഒന്നടങ്കം പണിമുടക്കി പ്രകടനം നടത്തുകയായിരുന്നു. തുടര്‍ന്ന് യൂനിയന്‍ നേതാക്കളുമായി പൊലിസ് ചര്‍ച്ച നടത്തിയെങ്കിലും തീരുമാനമായില്ല. തുടര്‍ന്ന് നാളെ ഡിവൈ.എസ്.പിയുടെ നേതൃത്വത്തില്‍ ചര്‍ച്ച നടത്താന്‍ തീരുമാനിച്ചു. പൊലിസ് ഉദ്യോഗസ്ഥര്‍ ഉള്‍പ്പെട്ട സംഘം ഓട്ടോയില്‍ യാത്ര നടത്തിയാണ് ഓരോ സ്ഥലത്തെയും ചാര്‍ജ് നിശ്ചയിച്ചത.് അത് കൗണ്ടറിന് മുമ്പില്‍ സ്ഥാപിക്കുകയും ചെയ്തു. ഓട്ടോ പണിമുടക്കിയതിനെ തുടര്‍ന്ന് യാത്രക്കാര്‍ വലഞ്ഞു. നിരവധി യാത്രക്കാര്‍ ഓട്ടോ കിട്ടാത്തതിനാല്‍ നടന്നും മറ്റു വാഹനങ്ങള്‍ വിളിച്ചും യാത്ര ചെയ്യേണ്ടിവന്നു.