ന്യൂഡല്‍ഹി: ഡല്‍ഹി സര്‍ക്കാര്‍ സമര്‍പ്പിച്ച ഒറ്റ-ഇരട്ടയക്ക പദ്ധത ഉപാധികളോടെ അംഗീകരിച്ച ഹരിത ട്രൈബ്യൂണല്‍ നടപടിക്കെതിരേ സര്‍ക്കാര്‍. ട്രൈബ്യൂണല്‍ മുന്നോട്ടുവച്ച ഉപാധികള്‍ ബുദ്ധിമുട്ടുണ്ടാക്കുന്നതാണെന്നും അതിനാല്‍ വിഷയത്തില്‍ നാളെ വീണ്ടും ട്രൈബ്യൂണലിനെ സമീപിക്കുമെന്നും ഡല്‍ഹി ഗതാഗത മന്ത്രി കൈലേഷ് ഗെലോട്ട് പറഞ്ഞു.
ഗതാഗത നിയന്ത്രണത്തില്‍നിന്നു സ്ത്രീകള്‍, ഇരുചക്ര വാഹനങ്ങള്‍, സര്‍ക്കാര്‍ ഉദ്യോഗസ്ഥര്‍ എന്നിവര്‍ക്ക് ഇളവു നല്‍കിയിരുന്നു. ഈ ഇളവ് ഒഴിവാക്കിയായിരുന്നു ഹരിത ട്രൈബ്യൂണലിന്റെ അനുമതി.
ഇക്കാര്യത്തില്‍ ട്രൈബ്യൂണലിന് നാളെ പുനഃപരിശോധനാ അപേക്ഷ നല്‍കുമെന്നും മന്ത്രി പറഞ്ഞു.
ഇരുചക്ര വാഹനങ്ങളെ നിരോധിക്കാനാകില്ലെന്നു പറഞ്ഞ അദ്ദേഹം, ദിവസേന 60 ലക്ഷത്തോളം വരുന്ന ഇരുചക്ര വാഹന യാത്രക്കാര്‍ക്കു മറ്റു ഗതാഗത സംവിധാനമൊരുക്കാന്‍ പര്യാപ്തമാകുന്നത്ര ബസുകള്‍ ഇല്ലെന്നും കൂട്ടിച്ചേര്‍ത്തു.