ഗുരുവായൂര്‍: ആര്‍.എസ്.എസ് പ്രവര്‍ത്തകന്‍ ആനന്ദന്‍ കൊല്ലപ്പെട്ട സംഭവത്തില്‍ മൂന്നുപേരെ പൊലിസ് അറസ്റ്റുചെയ്തു. ബ്രഹ്മകുളം സ്വദേശികളായ പുതുവീട്ടില്‍ ഫായിസ് (25), നമ്പറമ്പത്ത് ജിതേഷ് (22), മന്നീക്കര അരീക്കര കാര്‍ത്തിക് (26) എന്നിവരാണ് അറസ്റ്റിലായത്. നാലുവര്‍ഷം മുന്‍പ് കൊല്ലപ്പെട്ട ഫാസിലിന്റെ സഹോദരനാണ് ഫായിസ്. ഫാസില്‍ വധക്കേസിലെ രണ്ടാം പ്രതിയാണ് കൊല്ലപ്പെട്ട ആനന്ദ്.
പ്രതികളില്‍ കാര്‍ത്തികിനെ ഇന്നലെ നെന്‍മിനിയില്‍ തെളിവെടുപ്പിന് കൊണ്ടുവന്നു. നെന്‍മിനി മനപ്പറമ്പിലെ ആളൊഴിഞ്ഞ സ്ഥലത്തുനിന്നു വടിവാള്‍, വെട്ടുകത്തി, പൈപ്പ് എന്നിവ പൊലിസ് കണ്ടെടുത്തു. പ്രതിയുമായി പൊലിസ് ഒരുമണിക്കൂറോളം അവിടെ തെളിവെടുപ്പു നടത്തി. തുടര്‍ന്ന് പ്രതിയെ പാവറട്ടിക്കടുത്തുള്ള പെരിങ്ങാട്, തിരുനെല്ലൂര്‍, തൃത്തല്ലൂര്‍ എന്നിവിടങ്ങളില്‍ കൊണ്ടുപോയി തെളിവെടുപ്പ് നടത്തി.