ഇന്‍തിഫാദ'ക്കെതിരായ എതിര്‍പ്പിന് പിന്നില്‍ അറബി ഭാഷയോടുള്ള അലര്‍ജിയെന്ന്

ഇന്‍തിഫാദ'ക്കെതിരായ എതിര്‍പ്പിന് പിന്നില്‍ അറബി ഭാഷയോടുള്ള അലര്‍ജിയെന്ന് സത്താര്‍ പന്തല്ലൂര്‍

കോഴിക്കോട്: കേരള യൂനിവേഴ്‌സിറ്റിയിലെ കലോത്സവത്തിന് 'ഇന്‍തിഫാദ' എന്നു പേരിട്ടതിനെതിരേ വൈസ് ചാന്‍സലര്‍ അടക്കം രംഗത്തുവന്നതില്‍ പ്രതികരണവുമായി സമസ്ത യുവ നേതാവ് സത്താര്‍ പന്തല്ലൂര്‍. കുലുക്കുക, വിറപ്പിക്കുക എന്നതാണ് 'ഇന്‍തിഫാദ' എന്നതിന് അര്‍ത്ഥം. ഇന്‍ക്വിലാബ് പോലെ ഇന്‍തിഫാദയും അറബിയാണെന്നു മാത്രം. ഇതാണ് ചിലരെ ചൊടിപ്പിക്കുന്നത്.

'മുന്‍സിഫ്' കോടതിയും വകീലും ബദലുമെല്ലാം അറബിയില്‍ നിന്ന് സ്വീകരിച്ച പദങ്ങളാണ്. പക്ഷേ, ആരോട് പറയാന്‍. ഭാഷയും പുസ്തകവും വശമില്ലാത്തവരാണ് നാട് ഭരിക്കുന്നതെന്നും കാര്യസ്ഥന്മാര്‍ ഗവര്‍ണര്‍ പദവി കയ്യാളുകയാണെന്നും അവരുടെ ചെരിപ്പു നക്കാന്‍ വിധിക്കപ്പെട്ടവ വി.സിമാരായി മാറുകയാണെന്നും അദ്ദേഹം കുറ്റപ്പെടുത്തി.

പണ്ട്, പേരിലെന്തിരിക്കുന്നു എന്നു ചോദിച്ചവരുടെ നാടാണ് നമ്മുടേത്. ഇപ്പോള്‍ എല്ലാം പേരിലായിരിക്കുന്നുവെന്ന് അദ്ദേഹം ഫേസ്ബുക്കില്‍ കുറിച്ചു.

ഫേസ്ബുക്ക് പോസ്റ്റിന്റെ പൂര്‍ണരൂപം

പണ്ട്, പേരിലെന്തിരിക്കുന്നു എന്നു ചോദിച്ചവരുടെ നാടാണ് നമ്മുടേത്. ഇപ്പോൾ എല്ലാം പേരിലായിരിക്കുന്നു. ചിലർക്ക് ചില പേരുകൾ കേൾക്കുന്നതേ അലർജിയാണ്. അലഹാബാദ് മുതൽ ഹൈദരാബാദ് വരെയുള്ളവയുടെ പേര് മാറ്റാൻ നടക്കുന്നത് അത്തരക്കാരാണ്. മൃഗശാലയിലെ സിംഹങ്ങൾക്ക് അക്ബർ- സീത എന്നു പേരിട്ടപ്പോൾ മദമിളകിയതും അവർക്കാണ്.

ഇപ്പോൾ ആ സൂക്കേട് കേരളത്തിലെ ചിലർക്കും പിടികൂടിയിരിക്കുന്നു. കേരള യൂനിവേഴ്സിറ്റിയിലെ കലോത്സവത്തിന് 'ഇൻതിഫാദ' എന്നു പേരിട്ടതാണ് അവരെ ചൊടിപ്പിച്ചിരിക്കുന്നത്. കുലുക്കുക, വിറപ്പിക്കുക എന്നതാണ് അർത്ഥം. ഇൻക്വിലാബ് പോലെ ഇൻതിഫാദയും അറബിയാണെന്നു മാത്രം.

ഇതര ഭാഷാപദങ്ങൾ കടം വാങ്ങാത്ത ഏത് സമൂഹമാണ് ഭൂമിയിൽ ഉള്ളത്? ആരുമില്ല. 'മുൻസിഫ്' കോടതിയും വകീലും ബദലുമെല്ലാം അറബിയിൽ നിന്ന് നാം സ്വീകരിച്ച പദങ്ങളാണ്. അറബി-ഉർദു - ഹിന്ദുസ്ഥാനി പദങ്ങൾ കടമെടുക്കാത്ത ഹിന്ദി പാട്ടുകൾ ഉണ്ടോ? ഇല്ല. പക്ഷേ, ആരോട് പറയാൻ. ഭാഷയും പുസ്തകവും വശമില്ലാത്തവർ നാടുഭരിക്കുന്നു. കാര്യസ്ഥന്മാർ ഗവർണർ പദവി കയ്യാളുന്നു. അവരുടെ ചെരിപ്പു നക്കാൻ വിധിക്കപ്പെട്ടവ വി.സിമാരായി മാറുന്നു. അവർക്ക് മതവും മദവും ഇളകുന്നതാണ് ഇവിടെയെല്ലാം നാം കാണുന്നത്.