ചപ്പാരപ്പടവ്: ബൈക്കിലെത്തിയ യുവാവ് വികലാംഗനായ മത്സ്യവില്‍പ്പനക്കാരന്റെ പണം തട്ടിയെടുത്തതായി പരാതി. ചപ്പാരപ്പടവ് മംഗര ബദരിയ്യ നഗറിലെ കെ.എം അസൈനാ (52) റുടെ 22000 ത്തോളം രൂപയാണ് നഷ്ടപെട്ടത്. ഇന്നലെ രാത്രി  ഒമ്പതരയോടെയാണ് സംഭവം. ചപ്പാരപ്പടവ് മാര്‍ക്കറ്റിലും വാഹനത്തിലും വര്‍ഷങ്ങളായി മീന്‍ വില്‍പ്പന നടത്തുന്നയാളാണ് അസൈനാര്‍.  
വീടിന്റെ വരാന്തയില്‍ ഇരുന്ന്  മീന്‍ വിറ്റ് കിട്ടിയ പണം എണ്ണി തിട്ടപെടുത്തുന്നതിനിടെ  വെള്ളം  ചോദിച്ചെത്തിയ യുവാവ് പണം തട്ടിയെടുത്ത് കടന്നു കളയുകയായിരുന്നു. അസൈനാര്‍ ബഹളം വച്ചെങ്കിലും റോഡില്‍ നിര്‍ത്തിയിട്ടിരുന്ന ബൈക്കില്‍ യുവാവ് രക്ഷപെട്ടു. അസൈനാര്‍ തളിപ്പറമ്പ് പൊലിസില്‍ പരാതി നല്‍കി